Продюсер Гүлзира Айдарбекова танымал коуч Роза Әшірбаеваның келін мен ене арасындағы қарым-қатынасқа қатысты пікіріне қатысты өз ойын білдірді, деп хабарлайды Sn.kz ақпарат порталы.
Продюсердің пікірінше, отбасында үлкендерді сыйлау, жақындарымен ақылдасу және белгілі бір мәселе бойынша алдын ала ескертіп жүру қалыпты жағдай. Ол қазіргі жастардың сырт адамдардың кеңесіне тым көп мән беріп, ата-анасы мен отбасының пікірін екінші орынға ысырып жүргеніне алаңдайтынын айтты.
«Сұранса, бір жері кеміп қалады ма? Сұранбай кетсе, маңдайына мүйіз шыға ма? Жастар онсыз да өз ата-анасын емес, осылай ақыл айтатын адамдарды тыңдап, өзгеріп бара жатыр. Үлкенді құрметтеу жоғалып, бұлай азғыруға болмайды. Осындай ақылды өз ұрпақтарына үгіттеп бере бергені дұрыс-ау. Осыдан кейін отбасыларында қалай ауызбіршілік болсын?» – деді ол.
Гүлзира Айдарбекова өзі де ене екенін айтып, келіндерімен қарым-қатынасы туралы сөз қозғады. Оның айтуынша, отбасында бір-бірімен ашық сөйлесіп, ақылдасып отырған дұрыс.
«Мен де енемін. Келіндеріме бір нәрсе айтсам да, өзім бір жаққа барсам да ескертпей кетпеймін. Біз бір отбасы емеспіз бе? Кейде келіндеріммен ақылдасамын. “Не киемін, не алып барсам болады?” деп сұраймын. Олар да көмектесіп, қажет болса сыйлыққа тапсырыс беріп жатады. Олардың көмегі маған қуаныш сыйлайды», – деді продюсер.
Ол сондай-ақ ерлі-зайыптылардың маңызды мәселелерді бір-бірімен ақылдасып шешкенін құптайтынын жеткізді. Айтуынша, қандай жағдай болмасын, адамның жанынан табылатын ең жақын адам – өз отбасы.
«Күйеуіңнен сұрансаң, не болыпты? Бір жағдай болса, жүгіріп келетін де сол отбасың, күйеуің емес пе? Әрине, Роза емес. Мен Розамен сыйласамын. Бірақ мына сөзі денемді тітіркентті», – деді Гүлзира Айдарбекова.
Продюсер келіндер мен енелерге сырттан келген әр кеңесті бірден қабылдамай, алдымен өз отбасының жағдайын ескеруге кеңес берді.
«Құрметті аналар, келіндер, біреудің емес, өз ақылдарыңызға жүгініңіздер. Мүмкіндік болса, өз анаңызбен ақылдасыңыз. Қандай болса да, өсек айтып отырған өз енеңіз де сіздің анаңыз. Сіз оның өмірін жалғастырып, сол әулеттің ұрпағын тәрбиелеп отырсыз. Нағыз жанашырыңыз – осы адамдар.
Ерегісті, менмендік пен өзімшілдікті тоқтатып, бір-біріңізге мейіріммен қарап өмір сүріп көріңіздер. Сонда жолдарыңыз ашылып, өмірлеріңіз де жақсы жаққа өзгереді», – деді ол.
Дереккөз: Skif News · Назым Сапар
