Астана қаласының әкімшілік құқық бұзушылықтар жөніндегі мамандандырылған ауданаралық соты блогер Ерболат Жанабыловқа қатысты әкімшілік істі тоқтатты, деп хабарлайды Sn.kz ақпарат порталы.
Сот мәліметінше, 30 қыркүйекте Жанабылов үйде жанжал шығарып, әйелі Эльмира Төлегенованың қолынан ұстаған. Осы әрекеті оның тыныштығын бұзу ретінде бағаланған.
Оқиғаға қатысты материалдар Әкімшілік құқық бұзушылық туралы кодекстің 73-бабы 1-бөлігі бойынша қаралған. Сот хабарламасында Жанабыловтың әрекетіндегі құқық бұзушылық фактісі іс материалдарымен, соның ішінде әлеуметтік желіде жарияланған бейнежазбамен расталғаны айтылған.
Сот отырысында блогер хаттамада көрсетілген жағдайларды мойындап, кінәсін растаған. Сонымен қатар әйелімен татуласуға ниетті екенін айтып, тиісті жазбаша келісім ұсынған.
Эльмира Төлегенова да сотта күйеуінің өзін ұрып-соқпағанын, араларында тек сөзге келіспеушілік болғанын түсіндірген. Ол Жанабыловпен татуласуға келісетінін айтып, құжатқа ешқандай қысымсыз қол қойғанын мәлімдеген.
Осыған байланысты сот тараптардың татуласуын ескеріп, әкімшілік істі тоқтату туралы шешім қабылдады. Қаулы әзірге заңды күшіне енген жоқ.
Сот Жанабыловтың бұған дейін мұндай құқық бұзушылық үшін жауапқа тартылмағанын да ескерген.
ӘҚБтК-нің 73-бабы отбасылық-тұрмыстық қатынастардағы адамдарға қатысты балағаттау, қорлау, кемсіту, тұрмыстық заттарды бүлдіру немесе тыныштықты бұзатын өзге де әрекеттерді қамтиды. Мұндай әрекеттер үшін ескерту, 20 сағатқа дейін қоғамдық жұмыстарға тарту немесе бес тәулікке дейін әкімшілік қамаққа алу қарастырылған.
Бұған дейін Эльмира Төлегенова әлеуметтік желідегі жазбасында Ерболат Жанабыловпен ажырасу процесінде жүргенін айтқан. Алайда полиция келген кезде ол шара қолданбау туралы арыз берген.
Соған қарамастан, Жанабылов әкімшілік жауапкершілікке тартылып, сот отырысы жабық режимде өткен.
Дереккөз: Skif News · Назым Сапар
