Сурет: Stan.kz коллажы
Әнші Қайрат Нұртастың шығармашылығына 20 жыл толуына орай өткен мерейтойлық концерті Алматыдағы Орталық стадионда жалғасын тапты. 4 қазанда өткен ауқымды шоуға 40 мыңға жуық көрермен жиналды.
Бұл туралы Qazaqtoday.info сайты хабарлайды.
Кештен кейін өнер иесі әлеуметтік желіде алматылық көрерменге алғысын білдірді.
«Рақмет, Алматы! 40 мың адам. Бұл тарихты бірге жаздық», – деп жазды Қайрат Нұртас.
Концерт барысында әнші көпшілікке жақсы таныс хиттерін орындап, жанкүйерлерімен бірге ән шырқады. Кештен алған әсерлерін желі қолданушылары да жарыса бөлісті.
«Мұндай халықты бұрын-соңды көрмеппін, лық толды», «Өте керемет концерт болды. Қайрат – аңыз», «Арнайы Бішкектен келдік, еш өкінбедік», «Бүкіл Алматы биледі», – деп жазды жанкүйерлер.
Кештің ерекше сәттерінің бірі – Қайрат Нұртастың қызы Алаумен бірге сахнада билеуі болды. Әнші «Ол сен емес» әнін орындап жатқанда, әкелі-қыз жұптың сахнадағы еркін қимылы көпшіліктің назарын аударды. Алаудың әкесінің жанында еркін билеп, қылық көрсеткен сәті желі қолданушыларына да ерекше әсер етті.
«Түрі – Жұлдыз, қылықтары – Қайрат», «Жұлдыз сияқты әдемі осы Алау қызы», – деп жазды желідегілер. Желі қолданушылары әкесі мен қызының сахнадағы жарасымды сәтін жылы қабылдап, Алаудың еркіндігі мен қылығын сүйсіне талқылаған.
Айта кетейік, Қайрат Нұртас шығармашылығының 20 жылдығына арналған алғашқы үлкен концертін 27 қыркүйекте Астанада өткізген. Мерейтойлық концерттер Шымкент, Қызылорда, Атырау және Ақтөбе қалаларында да жалғасады.
Мақаланы бағалаңыз 👇
Дереккөз: Qazaq Today · Алмас Жарасхан
