Біріккен араб әмірліктері іздеуде жүрген үш адамды Қазақстанға ұстап берді, деп хабарлайды KAZ.NUR.KZ Бас прокуратураға сілтеме жасап.
Құзырлы орган мәліметінше, бас прокурордың орынбасары Асхат Жұмағали бастаған Бас прокуратура делегациясы Біріккен араб әмірліктерінде өткен Қылмыстың алдын алу мен қылмыстық сот төрелігі жөніндегі БҰҰ-ның 15-ші Конгресінің жұмысына қатысты.
Сапар барысында БАӘ әділет министрі және бас прокурорымен кездесу өткізіліп, қылмысқа қарсы күрес пен іздеуде жүрген адамдарды экстрадициялау саласындағы өзара іс-қимылды нығайту мәселелері талқыланды.
"Аталған уағдаластықты іске асыру аясында Бас прокуратура, Ұлттық қауіпсіздік комитетінің Сыбайлас жемқорлыққа қарсы қызметі мен Ішкі істер министрлігінің Интерпол Ұлттық орталық бюросымен бірлесіп, Қазақстанның Біріккен араб әмірліктеріндегі елшілігінің қолдауымен қылмыстық жауаптылыққа тарту үшін аталған елден Қазақстанның үш азаматын экстрадициялады", – делінген хабарламада.
Олардың біреуі 2019-2020 жылдары сыбайласымен бірге Астанада халықаралық орталық салуға арналған жер учаскесін алуға жәрдемдесуге уәде беріп, алдау жолымен жәбірленушінің жалпы сомасы 368 мың АҚШ доллары қаражатын иемденген.
Тағы бір фигурант денсаулыққа қасақана ауыр зиян келтіру, тонау менбұзақылық жасады деген күдікпен іздеуде болған. Оған 2021 жылы Алматы қаласында адамдар тобы болып жәбірленушіге шабуыл жасап, оның денсаулығына ауыр зиян келтірді және жалпы сомасы 100 мың теңгеден асатын жеке мүлкін ашық түрде иемденді деп айып тағылды.
Үшінші күдікті биыл жазда Астана қаласында Қытай азаматының 24 200 АҚШ долларын ұрлады деген күдікке ілінген, бұл аса ірі мөлшерге жатады.
Аталған тұлғаларға қылмыстық қудалау органдарынан жасырынғаны үшін халықаралық іздеу жарияланған.
Кейіннен олардың Біріккен араб әмірліктерінің аумағында жүргені анықталып, Қазақстан Республикасы Бас прокуратурасының сұрау салуы бойынша елге экстрадицияланды.
Қазіргі уақытта барлық күдікті тергеу изоляторына қамалды, сотқа дейінгі тергеп-тексеру қайта басталды.
Мәтіннен қате тапсаңыз, бізге жазыңыз
Дереккөз: Nur.kz · Эльмира Асқарқызы
