Әнші Димаш Құдайберген жас әнші Садраддиннің Алматыда өткен жеке концертін жоғары бағалап, оның анасы Айгүл Есқараға ақжарма тілегін жеткізді, деп хабарлайды Sn.kz ақпарат порталы.
Димаш өнердегі інісінің концертінен үзінділерді көргенін айтып, Садраддиннің жетістігіне қуанышын білдірді.
«Балаңыздың аяқ алысы құтты болсын. Концерттің үзінділерін көрдім, керемет өтіпті. Бәріміз қуанып жатырмыз. Ініміздің алар белесі мен жеңістері көп болсын. Балаңыздың жетістігіне қуанып, нұрланып тұрған жүзіңізді көргенде, мен де өз анам қуанып тұрғандай ерекше күй кештім. Ұзағынан сүйіндірсін», – деді әнші.
Өнер иесі шетелдегі дайындықтарына байланысты концертке қатыса алмағанын да айтты. Дегенмен Садраддиннің алдағы уақытта халықаралық деңгейге көтеріліп, әлемнің үлкен сахналарында өнер көрсететініне сенім білдірді.
«Өзімнің дайындықтарыммен шетелде жүргендіктен, қолым босамады. Елде болғанда міндетті түрде қолдар едім. Садраддиннің, Алла қаласа, халықаралық деңгейге шығып, әлем бойынша бір стадионды жинап, концерт беретін күні болсын», – деді Димаш.
Өз кезегінде Садраддиннің анасы Айгүл Есқара Димаш Құдайбергеннің ұлына айтқан ақ тілегіне ризашылығын білдірді. Ол өнердегі әріптестердің бір-біріне қолдау көрсетуі маңызды екенін атап өтті.
«Әлем төбесіне көтеріп, мақтаныш тұтып жүрген Ақ Димаштың ақ тілегін қалай алмайын?! Қалай мақтаныш тұтпайын?! Өссе, қазағымыз өссін! Аяқтан шалу – болмағырдың ғана ісі», – деді Айгүл Есқара.
Оның айтуынша, Димаш әр қуанышта Садраддинге қолдау көрсетіп, үнемі жылы ықыласын білдіріп келеді.
«Әлем жұлдызымын деп жүрген жоқ. Әрбір қуанышта, концертте бірінші болып, Садрға үнемі бар жылуын, мейірімін төгіп тұрады. Алла саған мейірімін, махаббатын төге берсін, алтыным. Аман жүр, жүз жаса!» – деп ағынан жарылды әншінің анасы.
Айта кетейік, жас әнші Садраддин Алматыдағы стадионда жеке концертін өткізіп, оған 70 мың көрермен жиналған болатын.
Дереккөз: Skif News · Назым Сапар
