Өзбекстанда Наурыз мерекесі 5 күн бойы тойланады , деп хабарлайды 24kz.

Ұлыс күнінде қауіпсіздікке де аса мән беріледі. Құқық қорғау органдарының 20 мыңнан астам қызметкері тәртіпті қадағалауға жұмылдырылады. Одан бөлек, өрт сөндірушілер мен медицина саласының мамандары да мереке күндері күшейтілген режимде жұмыс істейді.

Дулат Нуркин, тілші:

- Ұлыстың ұлы күнін Өзбекстан кең көлемде атап өтеді. Мемлекеттік деңгейде мән беріліп, 5 күндік демалыс жарияланды. Ауа райы да жаңа жылды атап өтуге қолайлы болып тұр. Бүгін Ташкентте ауа температурасы 25 градусқа дейін ысыды. Ал демалыс күндері 30 градусқа барады деген болжам бар. Тұрғындардың жаңажылдық көңіл-күйін білу үшін Ташкент тұрғындарын сөзге тартып едім. Тыңдап көрейік.

Блиц 1:

- Наурыз мерекесі бізде кеңінен тойланады. Жаңа жылымыз болғасын ерекше атап өтуге тырысамыз. Қалада көптеген іс-шаралар өтеді. Сонда барып, тойлаймыз.

Блиц 2:

- Бұл күні біз мерекемен құттықтап, бір-біріміздің үйімізге барамыз. Түрлі тағамдар пісіріледі. Наурыздың біз үшін маңызы зор. Жалпы Орта Азия елдерінде ұлыс күні кеңінен аталып өтетінін білемін. Біз бұған қуанамыз.

Блиц 3:

- Наурызда ауа райы жылынып, күн ұзарады. Адамдар бірін-бірі жаңа жылмен құттықтайды. Бізге бұл мейрам сонысымен қызық. Парктерде түрлі тағамдар пісіріледі. Сумаляктан ауыз тиюге асығамыз.

Дулат Нуркин, тілші:

- Өзбек халқының Наурыз мерекесінде дайындайтын сумаляк деген тағамы бар. Біздің наурыз көже сияқты. Бірақ оны дайындау уақыты өте ұзақ. Бір тәулік бойы қайнатылады. Тағамнан барлық адам дәм татуы керек. Сумаляктан ауыз тиген адамның жыл бойы жолы болады деген тәмсіл бар. Айтпақшы, мереке күндері қауіпсіздікті қамтамасыз ету үшін құқық қорғау, өрт сөндіру және медицина қызметкерлері жұмылдырылады. Шетелдерден бір млн-ға жуық турист келеді деген болжам бар. Сондықтан қонақ үйлер мен демалыс орындарында баға сәл көтеріліп жатыр.

Авторы: Дулат Нуркин