Астана қаласы мәслихатының төрағасы Табиғат Зейнұлқабден елордадағы ұйымдардың жұмыс уақыты кестесін өзгертуге қатысты пікір білдірді, деп хабарлайды Kazinform.

Табиғат Зейнұлқабденнің айтуынша, әкімдікте мемлекеттік қызметшілер мен басқа да ұйымдардың жұмыс кестесін өзгерту туралы мәселе қаралып жатыр.

"Бұл көлік жүктемесін азайту үшін қажет. Қалада таңертең және кешке қарбалас уақытта көлік кептелісі пайда болады, әсіресе сол және оң жағалау арасында жүру өте қиын. Қазір жұмыс кестесі пысықталып жатыр. Кейбіреуінде сәл ертерек басталса, басқаларында жұмысы сәл кейінірек басталуы мүмкін. 2014-2015 жылдары осы тәжірибе қолданылған еді. Жақын арада тиісті шешімді қабылдаймыз", — деді ол парламент мәжілісінің жалпы отырысынан кейін тілшілер сұрағына жауап бере отырып.

Сонымен қатар қалалық мәслихат төрағасы "Астанадағы жұмыс кестесі қысқартыла ма?" деген сауалға жауап берген.

"Жұмыс уақыты қысқармайды, тек жұмыс кестесі реттеледі. Сегіз сағаттық жұмыс кестесі сақталады, бірақ кейбірі қызметіне ертерек кіріседі", — деп түсіндірді ол.

Табиғат Зейнұлқабден қаладағы жұмыс кестесін өзгерту қарбалас уақытта жолдардағы кептелісті жоюға септігін тигізетінін айтады.

"Жұмыс уақытын қысқартумен кептеліс мәселесі шешілмейді. Бірақ кестені 1-1,5 сағатқа өзгерту елеулі түрде әсер етеді деп ойлаймын", — деді мәслихат төрағасы.

Айта кетейік, бұған дейін елордада орталық атқарушы органдардың жұмыс уақыты өзгеруі мүмкін екенін айтылған еді.