Ресей Федерациясы аумағында 9 рет қылмыс жасаған алаяқ 10 жылдан кейін Ақмола облысында ұсталды, — деп хабарлайды Massaget .kz тілшісі.

Ақкөл аудандық полиция бөлімінің қызметкерлері 2015 жылдан бері мемлекетаралық іздеуде жүрген қылмыскерді қолға түсірді.

Қылмыстық істің фигуранты — Ресей Федерациясының азаматы, бірақ ол Қазақстанда туып-өскен.

56 жастағы ер адам 9 рет қылмыс жасаған, оның ішінде 8-і алаяқтық және сеніп тапсырылған мүлікті аса ірі мөлшерде ысырап ету ісі бойынша. 2015 жылғы тамызда ол Красноярск қаласының Кеңес аудандық сотының отырысына қатыспаған, сол уақыттан бері сот төрелігінен жасырынып жүрген.

Қылмыстық іс материалдарына сүйенсек, ол сотқа бармауының себебі емделіп жатқаны деп түсіндірген. 2018 жылы ол шекарадан заңсыз өтіп, Қазақстан Республикасына келген.

"Осы жылдар ішінде іздеуде болған қылмыскер туыстарының үйінде жасырынған, көшеге шықпай, тұрақты жұмыссыз өмір сүрген. Құжаттарын жоғалтып алғанын айтып, полициядан жалтаруға тырысқан", — деп жазылған хабарламада.

Қазір қылмыскер ұсталып, одан әрі тергеу жүргізіліп жатыр.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!