«Менің атым Қожа» 4K-да: реставрацияланған отандық классика Қазақстанның үлкен экранына қайта жол тартады, деп хабарлайды Skifnews.kz ақпарат порталы.

Қазақ киносының жауһары, режиссёр Абдулла Қарсақбаевтың «Менің атым Қожа» фильмі алғаш көрсетілгеніне 60 жыл толуына орай, Шәкен Айманов атындағы «Қазақфильм» АҚ бұл танымал туындыны еліміздің барлық өңірінде 2025 жылдың 20 наурызынан бастап «Kinopark/Kinoplexx» кинотеатрлар желісінде эксклюзивті түрде, қайта оралатынын хабарлады.

Бүкіл бір дәуірдің символына айналған, бірнеше буынды тәрбиелеген бұл фильм толықтай қалпына келтіріліп, үлкен экранға қайта оралды. Жаңартылған нұсқа фильмнің түпнұсқасының болмысын сақтай отырып, көрермендерге заманауи сапада тамашалау мүмкіндігін сыйлайды.

«Менің атым Қожа» фильмін қайта қалпына келтіру – фильмнің бейне мен дыбыс сапасын жақсартуға бағытталған жұмыс. Бұл процесс кадрларды тұрақтандырудан бастап, шуды жою және дыбыс пен бейнені синхрондауға дейін қамтыды. Әрбір кезеңде фильмнің түпнұсқалығын сақтай отырып, заманауи техникалық жетістіктер енгізілді. Бұл – барлық жастағы көрермендер үшін қазақ киносының классикасымен танысуға берілген бірегей мүмкіндік.

Енді көрермендер сүйікті комедиясын ұлттық рухы және атмосферасы сақталған жаңа әрі анық форматта тамашалай алады. Көрсетілімді Kinopark & Kinoplexx театрлар желісі «Қазақфильм» және Мәдениет және ақпарат министрлігінің қолдауымен ұйымдастырды. Сессия кестесі мен кинотеатрлар тізімін жобаның ресми әлеуметтік медиа парақшасынан және серіктестердің әлеуметтік желілерінен көруге болады, — деп хабарлады Қазақфильм.

Жоба тек мәдени ғана емес, әлеуметтік маңызға да ие: көрсетілімдерден түскен қаражаттың бір бөлігі басты рөлді сомдаған Нұрлан Санжарды (Сегізбаевты) қолдауға бағытталады.

Посмотреть эту публикацию в Instagram

Публикация от Қазақфильм киностудиясы / Киностудия Казахфильм им. Ш. Айманова (@qazaqfilm.kz)