Түркістанда Қазақстан мұсылмандары діни басқармасы имамдарының білімін жетілдіретін Ислам институты ашылады, деп хабарлайды Отырар телеарнасына сілтеме жасаған KAZ.NUR.KZ.

Телеарна тілшісінің хабарлауынша, бұл туралы Түркістан облысы әкімінің орынбасары Ертай Алтаевтың Қазақстан мұсылмандар діни басқармасының өкілдерімен кездесуінде айтылды.

Басқосуда облыс әкімінің орынбасары ислам орталығын ғылыми-зерттеу институты ретінде тіркеу мүмкіндігін қарастыруды ұсынды.

Аталған институт биыл пайдалануға беріледі деп жоспарланып отыр. Бұл орталықта Қожа Ахмет Ясауи еңбектері мен ғибратты хикметтеріне ғылыми-зерттеу жұмыстарын жүргізу, Түркістан, Жамбыл, Қызылорда, Ұлытау облыстары мен Шымкент қаласының дін саласында қызмет атқарып жүрген имамдарының білімін жетілдіру көзделіп отыр. Сонымен бірге тарихты, классикалық еңбектерді оқытып, діни мәселелерді түсіндіру қабілетін арттыру жоспарланған. Мұнда дін ғұламалары мен теологтар дәріс береді.