Қазақстан су спорты түрлері федерациясының президенті Андрей Крюков өз қызметін мерзімінен бұрын тоқтататынын мәлімдеді. Федерация президенттігіне "Самұрық-Қазына" ұлттық әл-ауқат қоры" акционерлік қоғамының басқарма төрағасы Нұрлан Жақыповтың кандидатурасы ұсынылды. Облыстық федерация басшылары мен спорт қауымдастығы өкілдері бірауыздан бұл ұсынысты қолдады, деп хабарлайды KAZ.NUR.KZ.

Бұл туралы Туризм және спорт министрлігінің баспасөз қызметі Telegram-дағы арнасында хабарлады.

Министрлік өкілдерінің мәліметінше, министр Ербол Мырзабосыновтың қатысуымен Қазақстан су спорты түрлері федерациясының былтырғы маусымды қорытындылау және жаңа маусымға дайындық бойынша кезекті жиыны өткен. Іс-шараға федерация президенті Андрей Крюков, облыстық федерация басшылары, спортшылар мен федерация өкілдері қатысты.

Кездесу барысында Андрей Крюков өз қызметін мерзімінен бұрын тоқтататынын мәлімдеді.

"Оның орнына федерация президенттігіне "Самұрық-Қазына" ұлттық әл-ауқат қоры" акционердік қоғамының басқарма төрағасы Нұрлан Жақыповтың кандидатурасы ұсынылды. Жиынға қатысушылар, оның ішінде облыстық федерация басшылары мен спорт қауымдастығы өкілдері бірауыздан бұл ұсынысты қолдады", — делінген министрлік хабарламасында.

Министр Ербол Мырзабосынов 2019 жылдан бері федерацияны басқарған Андрей Крюковке атқарған жұмысы үшін алғыс білдіріп, Нұрлан Жақыповқа жаңа қызметіне сәттілік тіледі.

"Туризм және спорт министрлігі атынан Андрей Крюковке елдегі су спорты түрлерінің дамуына қосқан үлесі үшін ризашылығымды білдіремін. Су спорты – Қазақстандағы ең танымал спорт түрлерінің бірі. Бүгінде 120 мыңнан астам адам осы спорт түрімен айналысады. Ұлттық құраманың халықаралық аренадағы жетістіктері осы спорттың ел ішінде кеңінен танымал болуына ықпал етті. Дмитрий Баландиннің 2016 жылғы Рио Олимпиадасындағы тарихи жеңісі және былтырғы әлем чемпионатында көркем жүзуден Эдуард Ким мен Наргиза Болатованың жеңісі – су спортының еліміздегі әлеуетінің жоғары екенін дәлелдеді. Федерацияның жаңа басшылығы бұл жетістіктерді одан әрі нығайтып, жаңа белестерге жетеді деп сенемін", — деді министр.

Айта кетейік, Қазақстан су спорты түрлері федерациясы 1998 жылы құрылған. Оның құрамына жүзу, су добы, көркем жүзу, суға секіру және ашық суда жүзу кіреді. Осы жылдар ішінде федерация көптеген талантты спортшыны тәрбиелеп, халықаралық деңгейде жоғары нәтижелер көрсетіп келеді.