Алматы облысында кәмелет жасына толмаған 3 бала адамшошырлық жағдайда өмір сүріп келген. Олар Алатау қаласына қарасты шаруа қожалығының аумағындағы ескі вагонды 2 жыл пана еткен. Бұл туралы "Алматы" телеарнасының материалында айтылды , — деп хабарлайды Massaget.kz тілшісі.

Алатау қаласына қарасты ауданда аштықтан ауыр дертке шалдығып, ақыры мүгедек болып қалған бүлдіршін анықталған. Чикиндер отбасында еңбек етіп, табыс табар ешкім жоқ. Отағасы денсаулығына байланысты көшеге шыға алмайды, ал анасы 2 балаға қараумен әлек. Татьяна Чикинаның айтуынша, кейінгі жылдары олар бір зейнетақыға қарап қалған, содан тұрмыстары күрт нашарлап кетіпті. Қаржы тапшылығынан кенжесі краббе ауруы, яғни ақуыз-энергетикалық жеткіліксіздігіне шалдыққан. Дер кезінде көмек көрсетпегеннің кесірінен 7 жасқа таяп қалған баланың физикалық жағдайы 4 жастағы баланікіндей дамымай қалған.

"Әлеуметтік көмек 3 жастан кейін тоқтады. Мен күйеуімнің денсаулығына байланысты жұмысқа шыға алмайтын болдым. Бір зейнетақыға өмір сүріп жүрміз, бірақ қаржы тіпті тамаққа жетпейді, оның үстіне балам ауырды. Аяққа тұра алмай жатырмыз. Ауруханаға жүгіндім, бірнеше рет ем алдық, қазір балаға мүгедектік жазып беру жұмысы жүріп жатыр. Кейінгі кезде құзырлы органдар азық-түлік әкеліп, жағдай сәл де болса жақсарды", – деді Алатау қаласының тұрғыны Татьяна Чикина.

Алатау қаласында тағдыр тәлкегіне ұшыраған тағы бір отбасы бар. Кәмелетке толмаған 3 баласы бар жанұя қала шетіндегі шаруа қожалығындағы ескі вагонды пана етеді. Іші қараңғы, сыз тартады, адам көрсе шошитын көрініс. 15, 5 және 3 жастағы балалар мұнда анасымен және оның екінші жұбайымен тұрады. Телеарна мәліметінше, бала физикалық қорлық көрген. Жағдайды көзбен көрген құзырлы орган өкілдері әйел мен балаларды тұрмыстық зорлық-зомбылық құрбандарына көмек көрсету орталығына орналастырған.

"Егер ата-анасы ішіп кетіп, балаларға қарамаған жағдайда мобильді топ құрып, комиссияның шешімі бойынша ата-ана құқығынан айыруға болады. Біздің міндетіміз — баланың және жәбір көрген, зорлық-зомбылық көрген ананың, құқығын қорғау", – деді Тұрмыстық зорлық-зомбылық құрбандарына әлеуметтік көмек көрсету орталығының директоры Ләйлә Кеңесханқызы.

Мұндай жағдайларды бақылауға алып, алдын алу үшін Алматы облысының прокуратурасы мобильді топ құрып, 13 мыңға жуық әлеуметтік осал топтағы отбасын тексерген.

Арнайы мобильді топ анықтаған қараусыз қалған бүлдіршіндер медициналық тексерістен өтіп, кейбірі ауруханаға жатқызылды. Прокуратура өкілдерінің сөзінше, жұмыстар үнемі жүргізіліп, жағдайы нашар жанұялар үздіксіз бақылауда болады.

Аптаның басты оқиғалары мен пайдалы видеоларды көру үшін YouTube арнамызға жазылыңыз