Астана әкімі Жеңіс Қасымбек автобус қатысқан резонанстық жол-көлік оқиғасына қатысты пікір білдірді. Апат салдарынан 8 жастағы Алуа есімді қыздың екі аяғы кесілген болатын, — деп хабарлайды Massaget.kz тілшісі.

Қасымбектің айтуынша, зардап шеккен қыздың отбасы баспанамен және қаржылай көмекпен қамтамасыз етіледі.

"Сақтандыру сомасы – шамамен 20 миллион теңге. Әкімдік тарапынан 10 миллион теңге бөлінді, қосымша тағы 10 миллион теңге беруді жоспарлап отырмыз. Сондай-ақ баспана мәселесін шешеміз. Ресми түрде мәлімдеймін: бұл отбасына пәтер беріледі", – деді әкім.

Апаттың себебіне қатысты сұраққа жауап берген әкім тергеудің аяқталуын күтуді сұрады.

"Кінәлілерді тергеу анықтайды. Бұл автобус жүргізушісінің тәжірибесі бар, ол осы салада және осы компанияда көптен бері жұмыс істеп келе жатқан адам. Қазір ол тергеу аясында ұсталды. Тағы да айтамын: тергеу аяқталған соң нақты себептер мен жауапкершілік деңгейі анықталады. Менің білуімше, бұл – жаңа автобустар", – деді Қасымбек.

Әкімнің айтуынша, қалаға шамамен 700 жаңа автобус жеткізілген. Ол олардың сапасы жақсы екенін атап өтті.

"Автобустар кейде жол апатына ұшырап жатады. Өкінішке қарай, мұндай оқиғалар бұған дейін де болған. Бұл тек биылғы жылдың ерекшелігі емес – мұндай жағдайлар 10, 20, 30 жыл бұрын да орын алған. Бұл – жол қозғалысы. Сондықтан да жол жүру ережелері бар. Кез келген көлік құралының қозғалысы белгілі бір қауіптермен байланысты. Мұны түсінуіміз керек. Өкінішке қарай, осындай қайғылы жағдай болды. Тағы да қайталаймын: тергеу аяқталған соң кінәлілер жауапкершілікке тартылады", – деді ол.

Зардап шеккен қыз туралы

Апаттан зардап шеккен қыздың аты – Алуа Бекен. Ол биыл бірінші сыныпты аяқтаған. Отбасы Ақмола облысындағы Егіндікөл ауылында тұрады. Алуа жазғы демалысқа елордаға келген.

Оқиға қалай болды

2 маусым кешке Астанада жолаушылар автобусы бағанаға соғылды. Апат салдарынан 15 жолаушы жарақат алды. 8 жастағы қыздың екі аяғы кесілді.

Автобус паркі №1-дің мәліметінше, жүргізуші бағананы байқамай қалған. Жол-көлік оқиғасының видеосы да тараған: онда автобустың Республика даңғылы бойымен баяу жылдамдықпен қозғалып келе жатқаны көрінеді. Астана қаласы Полиция департаменті аталған оқиға бойынша тергеу басталғанын хабарлады. Қылмыстық іс қозғалды, барлық мән-жайлар анықталып жатыр.

Алдын ала мәлімет бойынша, автобус жүргізушісі маневр жасау кезінде көлікті басқара алмай, ақпараттық тақтаның бағанасына соғылған. Қазір ол уақытша ұстау изоляторына қамалды.

Аптаның басты оқиғалары мен пайдалы видеоларды көру үшін YouTube арнамызға жазылыңыз