Бүгін АҚШ-тың Лос-Анджелес қаласының орталығына жиналуға заңмен тыйым салынды. Бұл туралы хабарлама шерушілерге телефон арқылы таратылған. Айта кетсек, Лос-Анджелесте заңсыз мигранттарды тұтқындау операцияларына қарсы шерулер үшінші күнге ұласып отыр. Тәртіпсіздіктерді тоқтату үшін қалаға ұлттық гвардия жауынгерлері енгізілді. Ал Пентагон бұл операцияға армияны да тартуы мүмкін екенін жоққа шығармады.

Лос-Анджелесте мигранттарды ұстауға бағытталған рейдтерге қарсы наразылық өткен жұма күні басталды. Ашу-ызаға булыққан демонстранттар рейд жүргізген федералды агенттермен қақтығысқан. Тәртіпсіздіктер тұрғындарының 80 пайызы латын америкалықтардан құралған Парамаунт ауданында болды. Көптеген көлікке өрт қойылды. Демонстранттарды тарату үшін полиция көзді жасаурататын газ қаруы мен құлақ тұндырғыш гранаталар қолданды. Шеруден хабар таратқан австралиялық журналист Лорен Томасидің аяғына тікелей эфир кезінде резеңке оқ тиген.

Алекса, Лос-Анджелес тұрғыны:

Олар тым шектен шықты. Адамдар бейбіт шеруге шыққан еді. Өзіңіз куәсіз. Көшеге шығып, өз қалауымызды білдіргіміз келді. Зорлық-зомбылық та болған жоқ. Бұған қарамастан бізге жайдан-жай оқ атты.

АҚШ-тың қорғаныс министрлігі Калифорния штатына әскер кіргізуі мүмкін екенін мәлімдеді. Пентагон басшысы Пит Хегсеттің айтуынша, Кэмп-Пендлтондағы теңіз күштері жоғары дайындыққа көшкен. Ал президент Дональд Трамп сенбінің кешінде Лос-Анджелеске ұлттық гвардияның 2 мыңдай сарбазын жіберді. Калифорния губернаторы Гэвин Ньюсом Вашингтон "шоу" болғанын қалайды деп мәлімдеп, мұны қолдамайтынын білдірді. Лос-Анджелес мэрі де Ақ үй әкімшілігін сынға алды.

Карен Басс, Лос-Анджелес мэрі:

Лос-Анджелесте президент әкімшілігінің әрекетінен бей-берекетсіздік белең алды. Адамдар наразылық білдіру құқығын пайдалануы керек. Ал ұлттық гвардияны тарту — қауіпті жағдай. Бұл жерде қоғам қауіпсіздігі ескеріліп жатқан жоқ. Ешқандай жоспар да, саясат та жоқ.

Дональд Трамп Truth Social әлеуметтік желісінде Калифорниядағы тәртіпсіздіктерді «заңсыз мигранттар мен қылмыскерлердің басып алуы» деп атады. Лос-Анджелесті мигранттардан босатуға уәде берді. «Би-Би-Си»-дің хабарлауынша, Трамптың екінші президенттік мерзімі басталғалы бері АҚШ-та көші-қон және кеден полициясы қамауға алған заңсыз мигранттардың саны көбейіп, 100 мыңнан асқан. Дональд Трамптың сайлауалды бағдарламасының маңызды пункттерінің бірі де заңсыз миграцияны тоқтату еді. Жуырда Ақ үй басшысы 12 елдің азаматтарына АҚШ-қа кіруге тыйым салғаны мәлім.

Арай Төлегенқызы