Елордада Жас архившілердің VIII халықаралық жазғы мектебі ашылды, деп хабарлайды 24kz.

Шара 3 күн жалғасады. Талқы тақырыбы да заман талабына сай. «Архивтердің цифрлық трансформациялануы және құжаттық мұраны сақтау». Форумға мұрындық болған Президент архивінде 1918 жылдан бергі 1 млн 500 мыңнан аса құжат сақталған. Мағлұматтар әлеуметтік-саяси сипатта. Қордың 25%-і цифрланған. «Бұл зерттеушілердің сұранысын толық қамтиды», - дейді мекеме директоры.

Әлия Мұстафина, ҚР Президенті архивінің директоры:

- Архивтің оқырман залы тек қана цифрлық түрде жұмыс істейді. Біздің бұл қор зерттеушілерге, қонақтарға цифрлық түрде қолжетімді. Бірақ әрі қарай осы жұмысты жалғастыру, дамыту, қалай оны жүйелеу, қандай халықаралық деңгейде бастамалар бар, методикалар бар, осы тақырыптар бойынша дискуссия жасаймыз.

Ольга Павленко, Ресей Мемлекеттік гуманитарлық университетінің проректоры:

- Архив мектебі адамдар арқылы ғана емес, технология, жаңа тренд және жаңа тенденциялармен де байланысты. Қазір архив мектебі жаңа форматтарды талқылап жатыр. Цифрлық нұсқадан тыс, Шанхай ынтымақтастық ұйымы, БРИКС әріптестігі аясында үлкен мүмкіндіктер ашылды. Әлбетте, Ресей мен Қазақстанның арившілері бірге көп нәтижеге жетті. Соның бірі – Әл Фараби атындағы Қазақ ұлттық универсиеті мен Ресей мемлекеттік гуманитарлық университеті бірлесе, архившілерді даярлау бойынша магистрлік бағдарламаны жүзеге асырды.