"Жігіттер" квартетінің әншісі Бағлан Әбдірайымовтың әкесі Ерғали Әбдірайымов Алматы әуежайының қызметкерін кепілге алды деген күдіктінің қолынан суық қаруын суырып алып, ерлік танытқаны үшін президенттің марапатына ие болған Әбдірайымов Мұса жайлы жазба жариялап, оны мақтан тұтатынын жасырмады, деп хабарлайды KAZ.NUR.KZ.

Әншінің әкесі Instagram желісіндегі парақшасында Мұса жайлы ақпарат ұсынған.

"Ата-анадан туған жеті бала, бір қыз едік.

Ішіміздегі кенжеміз, Әбдірайымов Мұса Сайранбайұлы. 1973 жылы, Түлкібас ауданы, Күмісбастау ауылында дүниеге келген.

Бүгін мені "Жігіттер" тобымен Қостанай қаласына 09.25 те концерттік шараға әуежайдан шығарып салып, ұшақтан түссек әлеуметтік жүйе қайнап, көптеген қоңырау түсіп, "Мұса сіздің ініңіз емес пе" деп қоңырау шалуда. Ішімнен не бүлдіріп қойды екен деп қобалжыдым. Сөйтсем нағыз ер мінезді жігіттің ісін жасап, елдің құрметіне ілініп жатыр екен.

Кәсіби спортпен шұғылданған. Қазіргі таңда 5 баласы бар, ардақты әке. Бүгінгі ерлігі рас еркекпін деп жүрген біраз жігіттердің қолынан келмейді.

Ешкім батыр боламын, қаһарман боламын деп жоспармен жүрмесі анық. Дер кезінде дұрыс шешім қабылдап, өзіңнің қоғам алдындағы жауапкершілігін сезініп, басыңды кепілдікке тігу үлкен ерлік пен имандылықтың белгісі.

Мемлекеттік марапатқа да ұсынып үлгеріпті. Бала-шағаның несібесі таусылмасын.

Кез келген марапатқа лайықтысың бауырым!

Біз сізбен мақтанып жүрейік", — деп жазды Ерғали Әбдірайымов.

Еске сала кетейік, бүгін, 7 наурызда Алматыда ер адам әуежай қызметкерін шашынан ұстап, пышақпен қорқытқаны хабарланған болатын. Әуежайдың баспасөз қызметінің хабарлауынша, 7 минуттан кейін құқық бұзушыдан полиция қызметкерлері мен әуежайдағы азаматтардың көмегімен суық қаруы алынды.

Президент Қасым-Жомарт Тоқаев күдіктінің суық қаруын тартып алып, ұстауға көмектескен ер адамның батылдығын ерекше атап өтіп, аталған азаматты мемлекеттік наградаға ұсынуды тапсырды.

Кейін "Жігіттер" квартетінің әншісі Бағлан Әбдірайымов Instagram желісінде видео бөлісіп, әуежайда жұмыс істейтін қызды құтқарған ер адам ағасы екенін айтты.

Алматы әуежайының қызметкерін құтқарып, оны кепілге алған ер адамды ұстауға көмектескен Мұса Әбдірайым оқыс жағдайдың қалай болғанын айтып берді.