0:00:00

Жаңалықтарды Telegram арнамыздан оқыңыз !

Атырау облысына қарасты Қызылқоға ауданында ғасыр жасаған әже тұрады. Саналы ғұмырының 84 жылын құрылыс саласына арнаған Ұлжан Темірболатованы ауылдастары «Құрылысшы әже» деп таниды. Мереке қарсаңында басынан небір қилы заманды өткеріп, талай нәубетті көріп, қазір ұрпақ өрбітіп, бейбіт елдің берекесін тілеп отырған әжеймен әріптесім Нұрсұлтан Нұрсейіт тілдесіп қайтты.

Ұлжан әжейді мейрамымен бізбен бірге немере-шөберелері де құттықтай келді. Саналы ғұмырында еңбектен қол үзбеген кейуана әлі де тың. 8 құрсақ көтеріп, олардан өрбіген 40-тан астам немере-жиен, шөберелерінің қызығын көріп отыр. 16 жасынан еңбекке араласып, ел басына төнген талай зұлматты еңсеруге ат салысқан ардагер-ана соғыс жылдары «Гурьев-Астрахан» теміржол құрылысын салғандардың бірі.

Ұлжан Темірболатова, Миялы ауылының тұрғыны:

Жол салып, топырақ тасып жүргенімізде самолёттер ұшады. Біздің самолёттер емес, дауысы қатты, мынаның даусы жіңішке аш масаның даусындай келе жатқанда «тығыл-тығыл» деп қазған шұқырымызға тығыламыз. Көрмегеніміз жоқ, аш жүрдік жалаңаш жүрдік. Сөйтіп жүріп жұмыс жасадым. Қай жұмыста жүрсем де жаман атақ алғаным жоқ. Тек алға, тек алға!

Ұлжан әженің ұрпақтары атаулы мерекелерде қарашаңырақта бас қосуды дәстүрге айналдырған. Кейуана әр отырыста көрген білгенін, көрегенді әңгімелерін кейінгі ұрпақтың санасына сіңіріп отырады.

Талғат Ғұбайдуллин, немересі:

Мен сүйікті немерісінің бірімін. Қонақтық демейді, той демейді бізді ала барады. Сол жердегі үлкендердің әңгімелерін тыңдатып, бата жаттатқызып біздерге өз өнегесін айтып отырады.

Балаларының алды жетпіске жетіп, кейінгілері алпыстың асқарына шықты. Олардан көрген ұрпақтарының өзі бір қауым елді құраған. Бар өмірін еселі еңбекке арнаған қайсар ана ұрпағының амандығын, заманның тыныштығын тілейді.

Нұрсұлтан Нұрсейіт