Биыл Ақмола облысында 4 адам суға батып кетті, оның біреуі 6 жасар бала. Шомылу маусымы басталмас бұрын төтенше жағдайлар департаменті өңірдегі 86 су айдынын зерттеп, оның 12-сі шомылуға жарамайтынын анықтады. Бүгінде жағажайлардағы қауіпсіздік күшейтілді. Күнделікті рейдтер ұйымдастырылып, балаларға қауіпсіздік ережелері жазылған парақшалар таратылады. Ал, демалушылар көп келетін Бурабай, Щучье, Үлкен Шабақты, Зеренді мен Қопа көлдерінің аумағында патрульдік бақылау ұйымдастырылды. Бұл мақсатқа 99 құтқарушы тартылған және 20 техника мен 32 жүзу құралы дайындалды. Су айдындарында қауіпсіздік ережелерін бұзғаны үшін 46 әкімшілік хаттама толтырылған.

Әмір Амангелді, облыстық Төтенше жағдайлар департаментінің азаматтық қорғаныс басқармасының офицері:

Бүгінгі таңда Ақмола облысының аумағында 74 ресми жағажай жабдықталып, жұмыс істейді. Оның ішінде 12-сі коммуналдық. 62-сі жеке меншік жағажай. Рейдтік іс-шаралар барысында құқықбұзушылықтар орын алған жағдайда оларға әкімшілік құқықбұзушылық кодексінің 412-бабына сәйкес айыппұл салынады.

Бибінұр Әмірханқызы