Бүгін Мәжіліс депутаттары «Жер қойнауы және жер қойнауын пайдалану туралы » кодекс пен Әкімшілік құқықбұзушылық туралы кодекске енгізілетін түзетулерді екі оқылымда қабылдады, деп жазады Egemen.kz.

Түзетуде заңсыз су алу, су объектілерінде, су қорғау аймақтары мен белдеулерінде құрылыс салу, суды пайдалану шарттары мен режимін бұзу, су объектілерінің арналары мен шекараларын өзгерту және басқа да заң бұзушылықтар үшін жауапкершілікті күшейту көзделген.

Заңға гидротехникалық құрылысжайлардың қатты тозуынан болуы ықтимал аварияларды уақтылы анықтау және жоюға бағытталған түзетулер де енгізілді. Яғни, осындай құрылысжайларға техникалық зерттеп-қарау жүргізбегені немесе дұрыс жүргізбегені үшін, сондай-ақ оларды қауіпсіздік декларациясынсыз пайдаланғаны үшін жауапкершілік қарастырылады.

Екі Кодексте жер асты сулары ресурстарын реттеу және пайдалану туралы біркелкі терминология қолдануға қатысты да түзетулер ұсынылды. Мысалы, Каспий теңізінің қазақстандық секторында көмірсутектерді барлау және өндіру жөніндегі операцияларды жүргізуге салынған тыйымды алып тастау; Арал өңірінің ерекше экологиялық мәртебесін ескере отырып, Арал теңізі шегінде жер қойнауын пайдалану жөніндегі операцияларды жүргізуге тыйым салынады.

Депутаттар түзетулерді қарау барысында жерасты суларын басқаруға қатысты мемлекеттік органдар арасындағы өкілеттіктердің ара-жігін ажырату бойынша Үкімет енгізген қосымша түзетулерді қолдады. Атап айтқанда, Мемлекет басшысының Ұлттық гидрогеологиялық қызметті қайта құру туралы тапсырмаларын іске асыру үшін қараусыз қалған, өздігінен төгілетін авариялық гидрогеологиялық ұңғымаларды жою мен консервациялау және жерасты суларын іздеу жұмыстарын жүргізу жөніндегі функциялар Су ресурстары және ирригация министрлігінің қарамағына берілді.