Елде жыл басынан бері пранк жасау арқылы қоғамдық тәртіпті бұзған 24 адам әкімшілік жауапкершілікке тартылды.

Ішкі істер министрлігінің мәліметінше, қазір ғаламторда контент үшін пранк пен эстремалды әрекет жасайтындар көбейген.

Авторлар ешкімге зиян келтірмейтін шараның орнына агрессиялық әрі өмірге қауіп төндіретін әрекет жасайды. Мамандар қоғамдық тәртіпті өрескел бұзып, адамның ар-намысын қорлағаны үшін тек әкімшілік емес, қылмыстық жауапкершіліктің де барын еске салады. Сондай-ақ тұрғындардан заңды сақтауды сұрады.

Шыңғыс Әлекешев, ІІМ ресми өкілі:

- Мысалы, Астанада блогерлер лифт ішінде мәйіт тасып және балтамен шабуыл жасап видео түсірген. Бұл видео жолаушылардың үрейін ұшырып, қатты қорқыныш тудырды. Аталған қатыгез пранктің барлық қатысушысы 15-30 тәулікке дейін әкімшілік қамауға алынды. Қатыгез пранктер мен трюктар өнер емес, бұл заң бұзушылық. Күмәнді көріністі түсірмес бұрын немесе оған қатыспас бұрын салдарын ой елегінен өткізіңіз.