Жезқазғандағы Бөгенбай батыр ықшамауданында балалар ойнайтын алаң жетіспейді, деп хабарлайды 24kz.

Тұрғындар заманауи нысандар салынғанын қалайды. Себебі, бүтін бір ауданда жалғыз ғана ойын алаңы бар. Оның өзі әбден тозған. Жергілікті жұрттың тілегі қашан орындалады?

Елдос Кәкенов, тілші:

- Сағынған Қанаева 10 жылдан бері Бөгенбай батыр шағын ауданында тұрады. Оның айтуынша, тұрғындар осыған дейін қала әкімдігіне ойын алаңын салу жөнінде бірнеше мәрте өтініш жолдаған. Себебі, 350-ге жуық тұрғын үй орналасқан ауданда жалғыз ғана ойын алаңы бар.

Сағынған Қанаева, қала тұрғыны:

- Балаларға ойын алаңы керек. Бүкіл осы вокзалдың балалары осы жерге келіп ойнайды. Басқа ешқандай жерде ойын алаңы жоқ. Алаңның түрі мынау.

Шағын аудандағы жалғыз алаңның өзі тозып тұр. Әткеншектер сынған, кейбір ойын элементтері мүлде жарамсыз. Соған қарамастан талапқа еш сай келмейтін алаңқайда балалар ойнауға мәжбүр.

Кентай Смағұлов, қала тұрғыны:

- 2 жылдан бері әбден жөндеп келеміз. Анау-мынау кетеді, кеткен жерінің бәрін сыммен байлап, сөйтіп жүрміз.

Шағын ауданға жаңа ойын алаңы қажеттігін қалалық әкімдік өкілдері де мақұлдап отыр. Дегенмен, бұл мәселе биыл шешілмейтін секілді. Өйткені шағынауданда негізінен жеке тұрғын үйлер орналасқандықтан, жаңа алаңқай салатын бос жер телімі жоқ. «Әзірге текескі алаңды жөндеп береміз», - дейді.

Әділ Темоханов, Жезқазған қалалық ТКШ бөлімінің маманы:

- Бос жер учаскелерін әлі де қарастыратын боламыз. Бюджеттің бөліну көлеміне байланысты келесі жылға жоспарға енгізетін боламыз. Бұған дейін орнатылған балалар алаңын осы жылы жөндеуден өткізетін боламыз.

Әкімдік өкілдерінің айтуынша, Бөгенбай шағын ауданынан бөлек қаладағы өзге де ойын алаңдарының шамамен 20%-і жөндеуді қажет етеді. Бұл мақсатқа қазынадан 33 млн теңге бөлінген. Бұдан бөлек, былтыр құрылысы басталған 31 ойын алаңы ел игілігіне беріледі.

Авторлары: Елдос Кәкенов, Нұрдәулет Аманкешов