Ұлытау облысында кәріз жүйелерінің 70 пайыздан астамы тозған.

Жарты ғасыр бұрын салынған құбырлар биыл біренеше рет жарылды. Әсіресе шағын қалалар мен кенттерде жағдай мәз емес. Алдағы бес жылда кезең-кезеңімен ауқымды жаңғырту жұмыстарын жүргізу жоспарда тұр. Қазір өңірде төрт жоба қолға алынды.

Шағын қалаларды былай қойғанда, облыс орталығының өзі жетісіп тұрған жоқ. Жезқазғанда 5-шағын аудандағы тозған құбыр бірнеше рет жарылып, айналаны қолқаны қабатын иіс басады. Әсіресе жазда қиын дейді тұрғындар. Көптің тілегі биыл орындалмақ. Мұнда жаңа кәріз желісі тартылып жатыр.

Дархан Желібаев, Жезқазған қаласының тұрғыны:

- Бұрын, иә, иіс болатын. Жағымсыз канализацияның иісі. Енді шынын айту керек, жаңа жүйеге әлі қосқан жоқ. Енді қосып жатыр. Қосқаннан кейін көре жатамыз.

Жаңа желінің ұзындығы жеті шақырымға жуық. Оған осы аумақтағы 30-ға жуық көпқабатты үй қосылады. Жаңғырту жұмыстары сәуір айында басталған.

Нұржан Тәжікеев, мердігер ұйым өкілі:

- Біздің Жезқазған скала, тас. Қиындықтар болып жатыр. Шамамен жұмысты магистраль бойынша 2,2 шақырым қаздық. Барлығы өзі берілгені 7 шақырым. Бүкіл 5-ықшам ауданы. Жоспар бойынша қазанға дейін берілген. Алла қаласа, ертерек бітіреміз. Жұмыстың қарқыны жақсы.

Жалпы облыс бойынша кәріз желілерінің ұзындығы 540 шақырым болады. Оның 71 пайызы тозған. Бұл көрсеткішті төмендету мақсатында бірқатар маңызды жоба қолға алынды. Жаңғырту жұмыстары бірқатар елдімекенде қатар жүріп жатыр. Жыл соңына дейін 100 шақырымнан астам құбыр ауыстырылады.

Балтабек Қадыров, Энергетика және ТҮКШ басқармасының бас маманы:

- №8 шағын ауданнан Сәтбаев қаласының кәріздік тазарту құрылыстарына дейін кәріз желілерін салу, Қаражал және Жәйрем кентіндегі кәріз желілерін жаңғырту жобасы бар. Бұл жобалар аясында 107 шақырым желілер жаңғыртылады. Жалпы алғанда бұл жобалар өңіріміздегі кәріз инфрақұрылымын жаңғыртып, халықтың санитарлық-экологиялық жағдайын айтарлықтай жақсартуға үлес қосатын болады.

Облыстағы кәріз суларын тазарту кешендері де біртіндеп қайта жаңартылады. Жезқазған мен Сәтбаевтағы құрылғыларды бойынша дайындалған жоба мемлекеттік сараптамадан өтті. Бұдан бөлек облыс орталығындағы Қостанкелді, Бекболатсай және Қабанбай батыр шағын аудандарында су бұру жүйесін жаңғыртуға бойынша сметалық құжат әзірленіп жатыр.

Елдос Кәкенов, Нұрдәулет Аманкешов 24KZ