Семейде болған жер сілкінісі кезінде дабыл жүйесі іске қосылмады.

Жерасты дүмпулері бірнеше минутқа созылғанымен тұрғындар ешқандай ескерту естімеген. Осыған байланысты жұрт дабылдың болмағаны туралы әлеуметтік желіде алуан пікір білдірді.

Бірнеше күн бұрын Абай облысында 4 балдық жер сілкінісі тіркелді. Жерасты дүмпулерін Семей тұрғындары да сезді. Оның ошағы Абай мен Шығыс Қазақстан облыстарының шекарасында тіркелген. Табиғи апат салдарынан қирау мен зардап шеккендер туралы ақпарат түспеді.

Нұрсұлтан Алдоңғаров — ТЖД басқарма бастығы:

- Зілзала ошағының магнитудасы 5,2 балл болды. ТЖД күштері мен «Қазселденқорғау» мамандары елдімекендердегі стратегиялық нысандар мен гидротехникалық құрылғыларды тексеріп шықты. Барлық жүйе штаттық режимде жұмыс істеп тұр

Дегенмен желі қолданушылары жер сілкінісі кезінде сирена дыбысы болмағанын айтады. Мамандар болса, дабыл жүйесі тек 5 балдан жоғары дүмпу болғанда іске қосылатынын түсіндірді.

Серік Төленбергенов, облыс әкімінің орынбасары:

- Ақпараттандыру жүйесі 5 балдан жоғары сілкініс кезінде іске қосылады. Жуырда болған дүмпу бұл шектен сәл төмен болды. Сондықтан дабыл берілмеді

Қазір Абай облысында 55 дыбыстық хабарлау құрылғысы жұмыс істеп тұр. Алдағы уақытта тағы 48-і орнатылады. Бұдан бөлек, теле-радио арқылы тұрғындарды жедел хабардар ету тетіктері де қарастырылған. Сейсможаттығулар тұрақты түрде өткізіліп тұрады. Әр оқу-жаттығуға кемінде 700 адам қатысады.

Әсет Жолдыбеков — ТЖД бастығы:

- Облыс аумағында және бүкіл Қазақстан бойынша «Жер-2025» командалық-штабтық оқу жаттығулары өтеді. Өзіміз арнайы тактикалық жаттығу өткіздік. Аталған жаттығуларды әр ауданда ұйымдастырдық

Сейсмологиялық карта деректеріне сүйенсек, Абай облысының басым бөлігінде 7 балға дейінгі жер сілкінісі болуы ықтимал. Ал Мақаншы ауданына қарасты бес ауылдық округ 8 балдық дүмпу аймағында орналасқан.

Авторлары: Аслан Әбутәліпов, Қарлығаш Қасиетова, Ботагөз Дандыбаева.