Елде 43 дәрігер Ұлттық ғылыми онкологиялық орталығының резидентурасын тәмамдады, деп хабарлайды 24kz.

Олар негізгі клиникалық бағыттар бойынша білім алып, емтиханды сәтті тапсырды. 8 түлек дәл осы орталыққа қызметке қабылданады. Оның ішінде анестезиолог, реаниматолог, радиолог және гастроэнтерологтар бар. Ал қалған түлектер өзге медициналық мекемелерде еңбек етеді.

Айта кетейік, дәл қазір ел бойынша алғашқы медициналық-санитарлық көмек көрсететін 30 онколог-дәрігер жетіспейді.

Оксана Шатковская, Ұлттық ғылыми онкологиялық орталығының басқарма төрағасының орынбасары:

- Кейбір өңірлерде жас мамандар үшін жан-жақты қолдау механизмі бар. Мысалы, Өскемен, Семей және Павлодарды атап өтуге болады. Соның өзінде жастарды ауылдық жерлерге тарту оңай болмай тұр. Мақсатты резидентура келісіміне сәйкес түлектер өз мамандығы бойынша міндетті түрде қызмет атқаруы қажет.