0:00:00

Жаңалықтарды Telegram арнамыздан оқыңыз!

Батыс Қазақстан облысында күннің күрт жылынып, қардың қарқынды еруіне орай ескерту жарияланды. «Қазгидромет» мамандары ертеңнен бастап Орал қаласы мен 8 ауданда ауа температурасы түнде де жоғарылайды деп болжап отыр. Бұл қарғын судың ағыны күшейіп, өзендерде мұз қабатының жұқаруына және су деңгейінің көтерілуіне әкелуі мүмкін. Сондықтан қала мен ауыл-аймақта қар шығарып, еріген қар суын сорғызып жатыр. Шаһарда бұл іске 300-ге жуық арнайы техника жұмылдырылған. Коммуналдық қызмет екі ауысымда тәулік бойы жұмыс істеп жатыр. Зачаган кентінде арықтағы қарды аршуға төтенше жағдай басқармасы әскери батальонының 50 қызметкері көмекке келді. Бүгіннен бастап қалалық штабтың байланыс желісі іске қосылды. Үйді су басу қаупі болған жағдайда тұрғындар арнайы нөмірлерге хабарласа алады.

Мұрат Бәйменов, Орал қаласының әкімі:

11-наурыздан бастап ауа райы күндіз де, түнде де жылы болады. Сол себепті қала бойынша 300-ге жуық арнайы техника жұмылдырып, соның ішінде 179 КаМАЗ техникасы қар шығарып жатыр. 40 шақты тиегіштер, 32 мотопомпа жұмыс атқарып жатыр. Тұрғындарды ауласындағы қарды шығаруға шақырамын.

Ардақ Мұратқызы