Мәскеу Донецк облысын толық бақылауға алуды көздеп отыр. Оның есесіне Ресей Запорожье мен Херсондағы майдан шебін тиіспеуге дайын. Бұл позицияны РФ президенті Владимир Путин 15 тамызда Аляскада АҚШ президенті Дональд Трамппен кездесуде айтты, — деп хабарлайды Massaget.kz тілшісі.

Бұл туралы Deutsche Welle мәлімдеді. Онда Financial Times-тің үш дереккөзге сүйенген мәліметтер жазылған.

Путин Украинадан Донецк облысының Киев бақылайтын бөлігінен әскерін әкетуді талап еткен. Мәскеудің айтуынша, егер келісімге қол жеткізілсе, Ресей жаңа аумақтарды басып алу үшін шабуыл бастамайды.

Қазір Ресей әскері Донецк облысының шамамен 70 пайызын ұстап отыр. Ал Украинадағы қалған бөлігі Киев үшін шығыс майдандағы әскери операцияларда шешуші рөл ойнайды.

Reuters-тің мәліметінше, Путин украиналық әскерді Луганск облысынан шығару талабын қойған. Ол өңірдің көп бөлігі ресейлік күштің бақылауында.

Украина президенті Владимир Зеленский бұл мәселелерді 18 тамызда Ақ үйде Трамппен талқылауы мүмкін. Сондай-ақ, егер үшжақты кездесу өтсе, Путинмен де қозғауға дайын екенін айтқан еді.

The New York Times мәліметінше, Трамп Украина мен Еуропадағы басты одақтастарымен келіспей, Путиннің уақытша бітім жөніндегі келісімнің орнына ауқымды бейбіт келісім жасасу туралы ұсынысын қолдаған сияқты.

Басылымның бағалауынша, бұл Ресейге келіссөздерде артықшылық береді және Аляскадағы саммит алдында Трамп, еуропалық одақтастар және Зеленский келісіп алған стратегияға қайшы келеді.

Axios-тың хабарлауынша, Киев Трамптың уақытша бітім талабынан неге бас тартқанын түсінбей отыр. Еуропалық одақ елдері де саммиттен кейінгі мәлімдемелерінде бітімнің міндетті шарты туралы бұрынғы ұстанымын қайталамады. Сарапшылардың айтуынша, бұл Трамппен қақтығыстан қашу амалы болуы мүмкін.

Мәселен, Германия канцлері Фридрих Мерц Украина мен Ресей арасындағы бейбіт келіссөздерді алдын ала бітімсіз-ақ өткізуге болатынын айтты. Бірақ ол үшін соғысты тоқтату жөнінде тез арада келісімге келу қажет. Бұл туралы ол dpa агенттігі хабарлады.

"Егер соған қол жеткізілсе, ол апталап жалғасатын, бірақ саяси және дипломатиялық ілгерілеуге әкелмейтін бітімнен әлдеқайда маңызды болар еді", – деді Мерц ZDF арнасына берген сұхбатында.

Аптаның басты оқиғалары мен пайдалы видеоларды көру үшін YouTube арнамызға жазылыңыз