Анкарада Осман дәуірінен қалған ежелгі бұйымдарды жинап жүрген коллекционер тұрады , деп хабарлайды 24kz.

Оның қолында империя дәуірінен тыс Түрік Республикасы кезеңіне тиесілі тарихи бұйымдар бар.

Әсия Нұрлыбаева, тілші:

- Анкаралық Исмайыл Караджаоғлы 30 жылдан бері ескі бұйымдарды жинаумен айналысады. Уақыт өте келе ол бұл іспен кәсіби түрде шұғылданып, көне бұйымдарды саудалай бастапты. Қазір оның қолында Осман империясы дәуірінен бастап Түркия Республикасының негізі қаланған алғашқы жылдарға тиесілі тарихи жәдігерлер бар.

Әсия Нұрлыбаева, тілші:

- Қоладан жасалған мына қазан, құмыра Осман дәуірінде асханаларда қолданылған. Яғни, 1 ғасырлық тарихы бар. Ауыл халқы бұл бұйыммен суды ысытып, қайнатып ішкен. Ал мына кофе диірмені 1960 жылдарға тән бұйым. Анадолы халқы ертеректе бұл диірменмен Иран, Ирак, Үндістан елдерінен жеткізілген кофе дәндерін ғана емес, бұрыш, дақылдарды мына шағын диірменмен езіп, пайдаланған.

Исмайыл Караджаоғлы, коллекционер:

- Бұл заттарды ұзақ жылдар бойы жинадым. Ескі жәдігерлерге қызығушылықтан басталған бұл хоббиіммен қазір кәсіби түрде айналысамын. Тұрмысқа қажетті ерекше бұйымдардың кейбірін өзіме қалдырамын. Ал енді бір бөлігін коллекционерлер мен әуесқойларға сатамын. Өйткені ескі заттарға қызығушылық жылдан жылға артып келеді.

Түркияда көне бұйымдар нарығы айтарлықтай кеңейіп отыр. «Әсіресе, Осман дәуіріне тиесілі жәдігерлерге сұраныс жоғары», — дейді коллекционер.

Исмайыл Караджаоғлы, коллекционер:

- Әр жәдігердің артында тұтас бір тарих жатыр. Мысалы, мына ыдыс 1920 жылдары соғыс кезінде сарбаздарға ыстық тамақ тасу үшін қолданылған. Ыстықты ұзақ сақтайды, әр бөлігі ашылып-жабылады. Қарапайым металл ыдыс қазір өткеннің үнсіз куәгеріне айналып отыр.

Түркияда Исмайыл сияқты ескі бұйымдарды көзінің қарашығындай сақтап, жәдігер жинаумен айналысатын коллекционерлердің қатары көп.

Мұса Уйсал, Анкара қаласының тұрғыны:

- 8 жасымнан бері тарихи бұйымдарға қызығамын. Хобби ретінде жәдігер жинап жүргеніме 15 жылдай болды. Қазір қолымда ескі кітаптар, қалам, сөмке бар. Ұнатқан бұйымдарымды көбіне Исмайыл досымнан сатып аламын.

Исмайылдың келешекке жоспары көп. Қолданыстан шығып, ұмыт бола бастаған бұйымдар бойынша кітап жазу ойында бар. Сондай-ақ жәдігерлер қатарын ұлғайтып, туристерге ұсынамын деп отыр.

Авторы: Әсия Нұрлыбаева