Өңірде 63 жылу қазандығы толығымен жаңартылды .

10 шақырымнан астам жылу желісі жөнделді. Бұл жұмыстарға ел қазынасынан 43 млрд.теңге бөлініп отыр.

Бурабай кентінің тұрғындары соңғы жылдары жылуға жарымай келді. Өйткені, ауылдағы шағын ғана жылу қазандығы қос бірдей елді мекенді жылумен қамтамасыз ететін. Былтыр көршілес Оқжетпес ауылында жаңа жылу қазандығы салынып, мәселе толығымен шешімін тапқан.

Людмила Позднякова, Бурабай кентінің тұрғыны:

- Мен сіздерді үйіміз өте суық болған кезде шақырғаным есімде. Міне, содан кейін жағдай тұрақталды. Соңғы жылыту маусымында үйіміз жылы болды. Біздің үйлер ескі және ауылдың шетінде орналасқан. Содан кейде жылу қысымы жетпей жататын. Қазір бәрі жақсы.

Қазір ауылда 1800 үй орталықтандырылған жылу желісіне қосылған. Оған нысандағы 3 жылу қазандығының қуаты толығымен жетеді,-дейді мамандар. Мекеме қызметкерлері биыл да ескірген бірқатар қондырғыны жаңартып қойған.

Темірлан Асқаров, Жылумен қамту мекемесінің басшысы:

- Біздің жұмысшыларымыз «теплолмаг»-тың ішін тазалап бітірді. Бір «поровой котель»-дің ішіндегі құбырларын ауыстырдық. Үш су қазандығының ішінде құбырларын жаңартып, тазалап, ауыстырдық.

Бурабай ауданында биыл жылыту маусымына 900 млн теңгеден астам қаражат бөлінді. Қомақты қаржыға Шучинск қаласындағы жылу орталығында 3 қазандық ауыстырылып, жаңа техникалар сатып алынды. Енді мамандар жылу желілерін жаңартуды көздейді. Өйткені, аудандағы жылу желілері 70 пайызға тозып тұр.

Асхат илдебаев, шучинск қаласы жылу орталығының директоры

- Қазір Щучинск қаласы мен Бурабай және Зеленобор ауылындағы жылу желілерінің басым бөлігі тозған. Қазір осы мәселені шешу мақсатында 2 жобалық сметалық құжатты әзірлеп қойдық. Құжат сараптамадан өтті. Енді қаржы бөлінгенін күтіп отырмыз.

«Облыс тұрғындары қыстан қысылмай шығуы үшін 947 мың тонна көмір қажет. Соңғы 4 айда соның 206 мың тоннасы жеткізілді. Әзірге көмірге деген тапшылық жоқ. Баға да тұрақты», — дейді жауаптылар.

Ботагөз Сабекова, облыстық Энергетика және ТКШ басқармасының баспасөз хатшысы

- Қазіргі уақытта өңірде көмір қоры жеткілікті. 1 тоннасы 18 мың теңгеден сатылып жатыр. Әзірге баға тұрақты. Алдағы уақытта қалай болатынын нақты айта алмаймыз. Әзірге қара отын тапшылығы сезілмейді.

Ал аймақта жылыту маусымы қазан айының басында басталады. Ең бірінші кезекте жылу балабақша, мектеп және ауруханаларға беріледі.

Авторлары: Абзал Азаматұлы, Евгений Шинкаренко