Сербияның Ниш қаласында өтетін бокстан әйелдер арасындағы әлем біріншілігінің жеңімпаздары мен жүлдегерлері қанша сыйақы алатыны белгілі болды, деп хабарлайды Kazinform.

Агенттіктің жазуынша, халықаралық бокс қауымдастығы (IBA) 2025 жылғы 9-16 наурыз аралығында Ниш қаласында өтетін әйелдер арасындағы бокстан әлем чемпионатының ақшалай жүлдесін жариялаған.

Бұл додада әлем чемпионы атанған боксшы 100 мың АҚШ долларына ие болады. Ал күміс жүлдегер атанған боксшылар 50 мың, қола медальға қол жеткізген боксшыларға 25 мың АҚШ доллары көлемінде қаржылай сыйақы беріледі.

Сондай-ақ биылдан бастап бокстан әлем чемпионаты тарихында алғаш рет ширек финалға өткен барлық спортшы қаржылай марапатқа ие болады. Оларға 10 мың доллар көлемінде сыйақы қарастырылып отыр.

Естеріңізге сала кетейік, бұған дейін әлемдік додаға Қазақстан атынан кім қатысатынын хабарлаған едік.