Астанаға ымырт жабылып, кеугім түссе де, Ақорданың саяси қарбаласы тыншымады. Бас резиденция Еуропалық Кеңес Президенті Антониу Коштаны қарсы алды. Кәрі Құрлықтан келген қонақты Қасым-Жомарт Тоқаев күтіп алды.

Биыл Қазақстан мен Еуропа Одағы Кеңейтілген серіктестік және ынтымақтастық туралы келісімге қол қойғанына 10 жыл толды. Келіссөз басында мемлекет басшысы бұл сапардың атаулы датамен тұспа-тұс келгенін ерекше атап өтті. Астана – Еуропа Одағымен осындай мәмілеге келген аймақтағы тұңғыш мемлекет.

Қасым-Жомарт Тоқаев, Қазақстан Республикасының Президенті:

- Сіздің сапарыңызға ерекше мән береміз. Бұл Қазақстан мен Еуропа Одағы арасындағы сан қырлы ынтымақтастықты одан әрі кеңейтуге қос тараптың да дайын екенін көрсетеді. Біз өзара құрмет пен түсіністікке негізделген берік әрі мазмұнды серіктестікті қолдаймыз. Өзара саяси диалогымыз ортақ мүддемізге сәйкес келетін көптеген бағыт бойынша қарқынды дамып келеді.

Он жылдың орамында қос тарап та толағай табысқа жетті. Былтыр екіжақты тауар айналымы шамамен 50 миллиард долларға жетті. Кәрі Құрлықтың Орталық Азиямен сауда-саттығының 80 пайызы Қазақстанға тиесілі. 2005 жылдан бері Еуропадан 200 миллиард долларға жуық инвестиция келген. Оған қоса елде 4 мыңнан астам еуропалық компания бар. Олар энергетика, көлік, цифрландыру және өнеркәсіп салаларында жұмыс істейді.

Қасым-Жомарт Тоқаев еуропалық бизнеске тұрақты әрі ашық инвестициялық климатты қамтамасыз етуге бейіл екенін растады. Бұл — экономикадағы ықпалдастық. Ал осы алыс-берістің игілігі енді барыс-келіске тиеді. Қазақстан мен Еуропа визалық режимді жеңілдету жұмысын бастап кетті. Нәтижесі табысты болатынына сенім мол. Өйткені Кәрі құрлықтың елімізге деген ықыласы ерекше.

Антониу Кошта, Еуропалық Кеңес президенті:

- Соңғы 10 жылда Еуропа Одағы Қазақстанның ең ірі сауда серіктесіне және шетелдік инвесторына айналды. Өз кезегінде Қазақстан Еуропаға мұнай мен уран жеткізуші елдердің үштігіне кіретін ел ретінде экономикалық қауіпсіздігімізді қамтамасыз етуде негізгі рөл атқарады. Бүгін біз қарым-қатынасымызды нығайтудың және экономикалық байланыстарды дамытудың жаңа кезеңіне қадам басамыз.

Кездесуде екі тарап та серіктестікке серпін беруді қолдады. Қасым-Жомарт Тоқаев гуманитарлық ынтымақтастыққа айрықша назар аударып, Еуропа Одағының білім беру бағдарламаларына ризашылығын білдірді. Оның аясында 5 мыңнан астам қазақстандық студент пен оқытушы білімін жетілдіріп, тәжірибеден өтуге мүмкіндік алды.

Ал Антониу Кошта Қазақстанның саяси ұстанымын қолдап, өңірдегі қауіпсіздікті қамтамасыз ету Транскаспий көлік дәлізін дамытуға тың мүмкіндік беретінін жеткізді.

Бекзат Аманов, тілші:

- Достыққа дем беру талқыланған кездесу аяқталды. Саясаткерлер келіссөздегі келелі келісімдерді журналистерге арналған брифингте жіктеп-жіліктеп береді. Сәлден соң дәл осы мінберде тараптардың байламы мен бағамын білеміз. Мәлімдемелерді мінсіз таспалауға БАҚ өкілдері дайындалып жатыр.

Операторлар объективін реттеді, тілшілер соңғы дайындықты пысықтады, шетелден келген қонақтар да саясаткерлер келіссөзінің қорытындысын асыға күтіп отыр. Делегациялар жайғасқан соң, брифинг те басталды. Президент баяндамасын қонаққа ілтипат көрсетуден бастап, нақты нәтижемен қоштады.

Қасым-Жомарт Тоқаев, Қазақстан Республикасының Президенті:

- Бүгін біз сауда-инвестициялық байланыстарды одан әрі арттыруға және әртараптандыруға уағдаластық. Қазақстан алдағы уақытта да еуропалық бизнес өкілдеріне тұрақты әрі ашық инвестициялық климат қалыптастыруды жалғастыра береді. Энергия тиімділігі, аса маңызды минералдар, цифрлық технология және көлік байланысы секілді салаларда ынтымақтастыққа мүмкіндік мол.

Келіссөз үстелінде энергия ресурстарының тұрақты жеткізілімін қамтамасыз ету мүмкіндіктері талқыланған. Тараптар аса маңызды минералдар, атом энергетикасы, мұнай химиясы бағытында ынтымақтастықты кеңейтуге уағдаласты. Мақсат – шикізат жеткізіп қана қоймай, табиғи ресурстарды терең өңдейтін жергілікті өндірістерді дамыту, қосылған құны жоғары өнім шығару.

Қасым-Жомарт Тоқаев, Қазақстан Республикасының Президенті:

- Қазақстан Еуропа Одағының Орталық Азия елдеріне арналған 12 миллиард еуро көлеміндегі инвестициялық пакетіне қолдау білдіреді. Бұл қаржы көлік, шикізат ресурстары, «жасыл» энергетика және цифрлық технология жобаларын іске қосуға бағытталады. Бірлескен күш-жігер арқылы Қазақстанды Еуразия кеңістігіндегі басты көлік тораптарының біріне айналдыра алатынымызға сенімдіміз. Бұл барлық тарапқа да пайдалы.

Қасым-Жомарт Тоқаев білім, ғылым және академиялық ұтқырлық салаларында ұдайы қолдау көрсетіп келе жатқан Еуропа Одағына ризашылығын білдірді. Әрі қарай цифрландыру саласындағы келісімдерді жіпке тізді. Әдеттегідей көлік-логистика қатынастарын нығайтуға ерекше көңіл бөлінген. Бастысы сенімді серіктестік нақты нәтиже беріп отыр.

Антониу Кошта, Еуропалық кеңес президенті:

- Осы аптада Брюссельде визалық режимді жеңілдету жөніндегі келіссөзді бастадық. Бұл уағдаластық Қазақстан мен Еуропа азаматтары үшін өте маңызды екенін жақсы түсінемін. Келісімге қол қойылғаннан кейін азаматтарымыздың барыс-келісі, алыс-берісі жиілеп, білім алып, жұмыс істеуіне оңтайлы жағдай туады. Бұл халықтарымыз арасындағы достықтың нағыз символына айналады.

Антониу Кошта — екі жаққа арағайындық жасап жүрген саясаткер. Ынтымақтастыққа қосқан үлесі үшін Астанадан олжалы қайтты. Мемлекет басшысы мейманды І дәрежелі «Достық» орденімен марапаттап, еңбегін жоғары бағалады.

Бұл сапар — Қазақстан мен Еуропа арасындағы серіктестіктің жаңа кезеңін бастады деуге болады. Кәрі құрлық сауда-саттықты ғана емес, халық арасындағы байланысты да бекіткісі келеді. Мұндай пейілге Астана — ашық.

Авторлары: Бекзат Аманов, Ержан Қанапияұлы, Ділмұрат Сейдаханов