Қарағанды қаласында төтенше жағдайлар қызметі газды пайдалану және өрттің алдын алу бойынша кезекті рейд өткізді, деп хабарлайды 24KZ. Құтқарушылар жаңа салынған көпқабатты үйлердің жерасты паркингтеріне ерекше назар аударып, газ баллоны орнатылған көліктерге ондай тұрақтарға кіруге қатаң тыйым салынатынын ескертті. Мамандар жеке секторды да аралап, газ қазандықтары, плиталар мен басқа да жабдықтар қалай пайдаланылып жатқанын тексерді.

Бұл қаладағы көпқабатты үйлердің біріндегі көлік тұрағы. Мұнда күн сайын 112 автомобиль қойылады. Меншік иелері бірлестігі төрағасының айтуынша, көліктердің бірде-бірінде газ құрылғысы жоқ. Қауіпсіздікті тұрғындардың өздері бақылауда ұстайды.

Газ баллонымен жабдықталған көлікті паркингте қалдыруға болмайды. Себебі мұндай жабық нысанда желдету жүйесі шектеулі, ауаға тараған газдан адамдар улануы мүмкін. Сондай-ақ суықтан бірден жылыға кіру кезінде газ баллонының жарылыс қаупі жоғары. Егер тәртіп бірінші рет бұзылса, ол адамға ескерту беріледі. Қайталанса, 40 мың теңге көлемінде айыппұл салынады.

Құрмет Ағыбаев, меншік иелері бірлестігінің төрағасы:

- Бастапқы кезде газ баллонымен жабдықталған көліктердің тұраққа кіру жағдайы болған. Қазіргі таңда барлық тұрғындар, паркингті пайдаланушылар бұл тыйым туралы хабардар. Бізде алдын алу шаралары тұрақты түрде өткізіледі.

Құтқарушылар жеке секторды да аралап, тұрғындардың газ баллондарын және жылыту жүйесін қалай пайдаланатынын тексерді. Қазір жеке үйлердің біразына табиғи газ тартылған. Соның арқасында баллон пайдаланатындар азайды. Алайда мұнда да өрт қауіпсіздігі ережелерін қатаң сақтау қажет.

Екатерина Кашина, Қарағанды қаласының тұрғыны:

- Ескертулер жасады, біз оны түзетеміз. Бәрі талапқа сай болуы керек. Бұрын газ баллонын пайдаландық. Қазір табиғи газ жүйесі тартылды. Дегенмен оның өз қауіпсіздік ережелері бар.

Рейд барысында үй иелеріне жадынамалар таратылып, жиі кездесетін қателіктерге назар аударылды. Әсіресе баллондарды тек арнайы орында ғана толтыру маңызды. Екі қабаттан биік үйлерде газ баллонын пайдалануға мүлде болмайтыны ескертілді.

Құрмет Жұмекенов, ТЖД Мемлекеттік өрт бақылау басқармасы бастығының орынбасары:

- Айына жоқ дегенде орташа есеппен 10-15 факт болып тұрады. Біздің өрт сөндірушілер келген кезде барлық пәтерді қарап, газ баллоны анықталған жағдайда сол тұрғынға қатысты барлық материалды жинап, жергілікті атқарушы органның газ-теникалық инспекциясына жолдайды. Сол кісілермен әкімшілік хаттама толтырылады.

Құтқарушылар үй-жайларды тексеру жұмысын өңірдің барлық қала, аудандарында жүргізеді. Облыс бойынша жеке секторда 100 мыңнан астам үй бар.

Авторлары: Руслан Нұрланұлы, Сайран Ақамбаев, Аман Хамит