Петропавлдық жастар жалғыз тұратын қарияларға қол ұшын беріп, қыс бойы үй шаруасына көмектеседі. Ауласын қардан тазалап, отынын дайындап береді. Олар әзірге, 30 қарияны қамқорлыққа алды.

Қалада «Таза Қазақстан» республикалық акциясы аясында «Таза қала – таза жүрек» қайырымдылық шарасы жүріп жатыр. Жастар ресурстық орталығының мүшелері бүгін бірнеше қарияның үйіне барып, көмек көрсетті. Жалпы Солтүстік Қазақстан облысында жыл басынан бері тазалық шараларына 30 мыңға жуық адам қатысты. Өңірде апта сайын сенбілік ұйымдастырылып, қоғамдық орындар абаттандырылып, қоқыстан тазартылады.

Айсұлу Бекімова, қалалық жастар ресурстық орталығының нұсқаушысы:

- Бұл үйде мүгедектігі бар адамдар тұрады. Сондықтан біз оларды қамқорлыққа алып, әрдайым көмектесіп тұрамыз. Дәстүрге айналған игі бастама жастардың тәрбиесіне оң әсер етеді. Кейінгі буынның жанашырлығын көрген қариялар да марқайып қалады.