Есірткі таратқаны үшін сотталған 1200 адам шартты түрде мерзімінен бұрын шығуы мүмкін.

Бұл туралы Ішкі істер министрлігінің есірткі қылмысына қарсы іс-қимыл комитетінің төрағасы Қуандық Әлжанов хабарлады. Оның айтуынша, 2024 жылдың аяғында «Есірткі заттарының заңсыз айналымына қарсы іс-қимылға қатысты» заңнамалық актілерге өзгерістер енгізілді. Оған сай осындай қылмыстар үшін жаза өзгерді. Осылайша, есірткі сатуды ұйымдастырғандар мен оны таратқандар үшін жаза екі түрлі болады деп түсіндірді Қуандық Әлжанов. Бұрын олар бір бап бойынша жазаланған. Жаңа заң талаптарына сай есірткіні әр жерге жасырып қойып жүргендер бірінші рет ұсталса, шартты түрде мерзімінен бұрын шығу құқығына ие. «Бірақ әр жағдай жеке қаралады», - деді Ішкі істер министрлігінің өкілі. Бұл өзгерістер Қылмыстық кодекстің 297-бабына қатысты.

Қуандық Әлжанов, ҚР ІІМ Есірткі қылмысына қарсы іс-қимыл комитеті төрағасының орынбасары:

- Бұл жерде есірткі бизнесін ұйымдастырушылар мен есірткі таратушылардың жауапкершілігі ажыратылады. Есірткі дайындау, өңдеу және өндірумен айналысатындардың жауапкершілігі қатаңдатылады. Ал байланыссыз тәсілмен есірткі тарататындар – «есірткіні жасырып қойып кетушілер» үшін жауапкершілік жеңілдетіледі. 1-бөлім бойынша енді 5 жылдан 8 жылға дейін бас бостандығынан айыру жазасы қарастырылған, бұрын 10 жылға дейінгі жаза болатын. 2-бөлім бойынша 6 жылдан 10 жылға дейін қамау қарастырылған, бұрын 12 жылға дейін болған. 3-бөлім бойынша жаза 7 жылдан 12 жылға дейін төмендетілді, бұрын 15 жылға дейін болған.