Ахмет Байтұрсынұлы атындағы Тіл білімі институты қазақ тілін цифрлық технологияларда қолдану аясын кеңейтетін тың өнімдерін жұртшылыққа таныстырды .

Атап айтқанда, тілтанушылар Қазақ тілінің ұлттық корпусы, әмбебап электрондық сөздік, қазақша мәтінді автоматты тану жүйесі сынды смарт-өнімдер мен ғылыми еңбектер әзірлеген. Зерттеу жобалары отандық ғылым саясатын іске асыруға, қазақ тіл білімін дамытуға ықпал етеді. Әрі бұл — мемлекеттік тілдің зияткерлік әлеуетін насихаттауға жасалған қадам, — дейді ұйымдастырушылар. Айта кетейік, Президент қаңтар айында «Ана тілі» газетіне берген сұхбатында цифрлық технологияларды қолдануға назар аударып, еліміздің жаһандық бәсекеге қабілетілігі осыған байланысты, — деген.

Саясат Нұрбек, ҚР Ғылым және жоғары білім министрі:

- Тағы да бір үлкен алғышарт – ол цифрлық форматта тілді дамыту. Ол тілдің болашақта тірі қалуының алғышарты. Қазіргі таңда жасанды интеллект саласында үлкен революция басталды екі жыл бұрын. Алгоритмдерді адам баласы секілді тіл арқылы мәтінді түсінуге, жалпы болып жатқан процестерді түсінуге үйрете бастады. Тілдің бір жүйеге келтірілуі, тілдің ұлттық корпустарын қалыптастыру, соның арнайы форматқа көшірілуі енді кез келген тілдің алдында тұрған үлкен тапсырма, міндет.

Анар Фазылжан, А.Байтұрсынұлы атындағы Тіл білімі институтының директоры:

- Институт соңғы жылдары қазақ тілінің жасанды интеллектінің негізі ретіндегі ғылыми базасын әзірледі. Бірнеше ресурстарымыз бар. Бұл ресурсты қолданған кез келген тұтынушы қазақ тілі жөніндегі өзінің іздеген сөзі, құрылымы жөніндегі жан-жақты терең ғылыми дәйекті ақпаратты ала алады. Институт қазақ тілінің ұлттық корпусы деп аталатын қазақ мәтіндерінің «ақылды» базасын жасады. Бұл – қазақ жадының матрицасы. Себебі қазақтың қанша ғасырлар бойғы әлем, дүние, табиғат, қоғам туралы жинаған білімдері сөзде сақталады.