Астанада бір сағат ішінде 500 тақия тігіліп, рекорд орнады, деп хабарлайды 24kz.

Тақия Fest аясында ұйымдастырылған іс-шараға еліміздің барлық өңірінен 100-ге тарта ісмер жиналды. Арнамыздың түсірілім тобы мерекеге қатысып, шебер аналардың өнерін тамашалады.

Бақыт Топтаева, тілші:

-Наурыз мейрамына орай ұйымдастырылған Тақия Fest-ке Астана, Қарағанды, Ақтау, Шымкент, Атырау өңірінің шеберлері жиылды. Тіпті Алатаудың арғы бетінен қырғыз қолөнершілері де түркітілдес халықтардың өнерін дәріптеуге атсалысу үшін келген.

Айнагүл Жүсіпова, «Қырғызмұраз» қолөнершілер тобының жетекшісі (Қырғызстан):

- Қазақ бауырлош елімізге Ноурыз мейрамымен құттықтап, біз де сіздерге келіп қалдық. Бұл белдемше 100 жыл болған белдемше. Біздің чоң чоң енемізден қалған, осындай күміш салдырлақпенен жасалған біздің чоң енелеріміз осындай белдемше киген.

Ғасырлық тарихы бар сәукеле, белдемше, шолпылар. Көненің көзіндей сақталған осындай ұлттық киімдерін қырғыз әжелері жалпақ жұртқа арнайы көрсету үшін Арқа төріне алып келген екен. Астана мен өзге өңірлердің шеберлері де сәнді әшекейлері мен бұйымдарын ұсынды. Қолөнершілердің бәрі КИНЕС рекордтар кітабына кіруге ниетті. Бүгінгі фестивальдің басты мақсаты – бір сағатта 500 тақия тігіп шығу.

Әсемгүл Жақыпова, қолөнер шебері (Қарағанды):

- Бүгінгі іс-шараға 15 шебер әкелдім. Оның ішінде ертеңгі күні мода көрсетуге сонымен қатар бүгін Тақия Fest-ке қатысып, осы Астана қаласында ұйымдастырылып жатқан қазақтың ұлттық құндылығын дәріптейтін, ары қарай дамытатын. Сондықтан осындай үкілі тақия тігіп, қазіргі уақытта үлкен жұмыс жасайық деп жатырмыз.

Жоба авторы Құндыз Сәрсекеева бұған дейін де осындай іс-шара ұйымдастырған. Сөз арасында бізге Тақия Fest идеясының қалай туындағаны жайлы айтып берді.

Құндыз Сәрсекеева, Тақия Fest жобасының авторы:

- Ең бірінші бұл Тақия Fest-тің бастауы 2023 жылдан басталған.Ол кезде Қазақстанның барлық өңірінен қолөнершілер келді 200-ден аса. Сол онлайн отырған қыздарды оффлайн кездестіру болды. Бас біріктіру керек деген не? Сол тақия тігіп шығу болды ғой.

Рекордты орнатуға арналған тақия үлгісі алдын ала таңдалып алынған. Көк байрағымыздың түсіндей тақияларға ою-өрнек пен рәміздегі алтын түсті нышандары қондырылды.

Шебер аналардың алқалы жиыны ұлттық мәдениет пен қолөнерді дәріптеуге арналған. Қазақстандық Гиннесс рекордына тіркелген 500 тақия алдағы уақытта қайырымдылық қорлар арқылы әлеуметтік осал топ өкілдеріне таратылады.

Авторлары: Бақыт Топтаева, Арман ақшабаев