Еңбекшіқазақ ауданы аумағындағы облыстық маңыздағы «Түрген ауылы – Батан шатқалы» автожолында қар көшкіні болды. Бұл туралы Алматы облысы ТЖД баспасөз қызметі хабарлады.

— 23 наурызда сағат 08:28–де Еңбекшіқазақ ауданы аумағындағы облыстық маңыздағы «Түрген ауылы — Батан шатқалы» автожолының 23-24 шақырымында қар жамылғысының тұрақсыздығы және таулы беткейлерде қардың көп жиналуына байланысты өздігінен қар көшкіні жүрді, — делінген облыстық ТЖД хабарламасында.

Қазіргі уақытта қар көшкінің параметрлері нақтыланып жатыр.

Оқиға салдарын жою және қауіпсіздікті қамтамасыз ету мақсатында оқиға орнына «Қазселқорғау» ММ-нен 1 қызметкер мен 1 техника, сондай-ақ Алматы облысы ТЖД-нен 1 қызметкер мен 1 техника жіберілді.

— Азаматтардың өмірі мен денсаулығының қауіпсіздігін қамтамасыз ету және төтенше жағдайлардың алдын алу мақсатында Алматы облысының «Жолаушылар көлігі және автомобиль жолдары басқармасы» шешіміне сәйкес, 2024 жылғы 15 қарашадан 2025 жылғы 31 наурызға дейін «Түрген — Батан — Асы обсерваториясы» облыстық маңыздағы автожолының 15-41 шақырым аралығы көлік қозғалысы үшін жабық. Азаматтарды қауіпсіздік шараларын сақтауға және маршруттарды жоспарлау кезінде осы ақпаратты ескеруге шақырамыз, — делінген хабарламада.