0:00:00

Жаңалықтарды Telegram арнамыздан оқыңыз!

Павлодарда өз балалары мен немере, шөберелерін ғана емес, жақын-жұрағат, көрші, тіпті қала мектептеріндегі ұл мен қыздың бағбаны болған ақжаулықты әже бар. Шәрбәт Төлеуқызы — құрметті ұстаз. Саналы ғұмырын ағартушылыққа арнап, зейнет демалысына шыққан ардагер қазір бұрынғыдан да жауапты жұмысты жүктеп алған. Ол балаларға ертегі оқиды. Қазақы тәрбиені саф күйінде дәріптеп жүрген жан.

Шәрбәт әже немере, шөберелерімен оқуға дайындықты әнұраннан бастайды. Қызыққан немерелерінің сыныптастары, көрші балалары да осында жиналады. Балалар әсіресе ертегі тыңдауға құмар.

Ертегі тыңдаған балалар ана тіліне терең бойлайды, салт-дәстүрмен сусындайды. Шәрбат әже шырқаған бесік жырын да тыңдайды. Ұғынықты болу үшін шәкірттеріне заманауи тілмен жеткізеді. Бесікті баланың өзінің үйі деп айтуға болады.......

Ақ жаулықты ұстаздың ұлағаты да бөлек. Балаға ұрыспайды. Тек жаза басудан сақтандырады. Ескінің өнегесімен өрісін кеңейтуге көңіл бөледі.

Шәрбәт Төлеуқызы, ардагер ұстаз:

Қазақтарда көбінесе мынау айтылған «Байқа! Суға кетіп қалма! Қолынды күйдіріп алма! Үстіңе ыстық су құйылып кетпесін! Ошақтың басына бармаңдар! Біз бір жаққа кетіп барамыз, оттың маңайында жүрмеңдер!» Осылай ылғи қауіпсіздікті ғана айтқан. Ал, былайғы дүниенің бәрін қазақ көрсеткен.

Яғни, қазіргі үш буын әсіресе қалада тұратын бала-ана-әже үй шаруасынан бастап түзде қалай жүріп-туру керектігін бірінен-бірі көріп үйренуі керек. Сонда ғана тілге тірек, әдет-ғүрыпқа ұйытқа бола алады дейді ол.

Айару Жарқынқызы, немересі:

Маған заманауи әндер ұнайды. Бірақ менің әжем кішкентай кезімнен бастап қазақтың ұлттық әндеріне үйреткен еді. Сондықтан мен осы бала кезімнен өзімді қазақтың ұлттық әндеріне жақын сезінемін.

Шәрбат Төлеуқызы қазақтың ауыз әдебиетіндегі ертегілердің бәрін жатқа біледі. Ұрпақты ұлттық санаға еліткен ұстаз күніге болса да білім ошақтарына барып балаларға ертегі оқудан жалықпайды. Себебі жақсыны жалғастыру парызым деп санайды.

Шәрбәт Төлеуқызы, ардагер ұстаз:

Әр үйдің өзінің шаңырағында бір мәдениет болады. Өзінің шаңырағында бір этика болады. Өзінің шаңырағында ұстанған ұстанымы болады. Сол ұстанымды әрбір шаңырақ ұстайтын болса, кім көрінгеннің салтына, дәстүріне еліктемей ұстайтын болса, онда біз дұрыс жолға барамыз деп ойлаймын.

Болат Аманбаев