Премьер-министр Олжас Бектенов Павлодар облысына жұмыс сапарымен барды, деп хабарлайды 24kz.

Оның аясында Үкімет басшысы KAZ Minerals Bozshakol және Қазақстанның вагон жасау компаниясының тынысымен танысты. Екібастұз ГРЭС аумағында энергетиканы дамыту мәселелері бойынша республикалық кеңес өткізді. Онда Мемлекет басшысының өнеркәсіпті дамыту, отандық тауар өндірушілерді қолдау және цифрлық шешімдерді енгізу жөніндегі тапсырмаларының, іске асу барысы талқыланды.

Премьер-министр «Бозшакөл» мыс кеніші алаңында технологиялық үдерістермен танысты. Зауыт жылына 30 млн тонна кен өңдейді. Өткен жылы 105 мың тонна мыс өндірілді, сонымен қатар мұнда мыс, алтын, күміс және концентраттағы мырыш өндіріледі. Дайын өнім Қытай, Түркия, Өзбекстан мен Бельгияға экспортталады. Мемлекет басшысының бастамасымен қолға алынған Жұмысшы мамандықтары жылы аясында жас мамандар даярлауға ерекше көңіл бөлініп жатыр. Биыл кәсіпорын ақылы тағылымдамадан өту үшін 200-ден астам студент тартуды жоспарлап отыр.

Олжас Бектенов, ҚР Премьер-министрі:

- Еліміз өңдеу саласына көшу керек, жоғары өңделген тауарлар өндіруді арттыру қажет. Мемлекет басшысы осындай міндет қойып отыр. Салық кодексінде жоғары өңделген тауарлар өндіретіндер салықты аз төлейтін қосымша жеңілдіктер қарастырылған. Бұның барлығы өңдеу саласын ынталандыру үшін жасалып жатқан қадамдар. Яғни, қаражат өз елімізде қалады деген сөз.

Үкімет басшысы сонымен қатар Екібастұздағы «Қазақстанның вагон жасау компаниясының» жұмысымен танысты.

Жоламан Ахмедиев, вагон жасау компаниясының бас инженері:

- Біздің қазір зауытымызда 800-ге жуық мамандар жұмыс істейді. 2025 жыл Жұмысшы мамандықтар жылы болғандықтан, қазіргі таңда зауытымызда оқу орнын ашып сол 800 қызметкерлеріміздің біліктілігін арттыруға жұмыс атқарып жатырмыз.

Премьер-министр Олжас Бектенов Президенттің энергетика саласындағы тапсырмаларының орындалуын барысын да тексерді. Екібастұздаға ГРЭС-1 жаңғырту нәтижелерімен, сондай-ақ ГРЭС-2 қайта жаңарту және ГРЭС-3 станциясын таза көмір технологиясымен салу жөніндегі жобалармен танысты.

Олжас Бектенов, ҚР Премьер-министрі:

- 2035 жылға дейін біз кем дегенде 26 гигаватт жаңа қуат көздерін қолданысқа енгізетін боламыз. Оны жаңартылатын энергия көздері, газ, гидро және атом энергетикасы қуаттарын іске қосу арқылы қамтамасыз ету керек. Күні кеше Мемлекет басшысы атмом энергиясы жөніндегі агенттік құру туралы жарлыққа қол қойды. Енді атом саласын жан-жақты дамыту, атом электр станцияларын салу, ядролық кластерді құру мәселелерімен жаңадан құрылған агенттік айналысатын болады.

Бүгінгі таңда Қазақстан бойынша 227 электр станциясы жұмыс істейді. Олар 56% тозған. Өткен жылдың қорытындысы бойынша электр энергиясын өндіру көлемі 4%-ке өсті. Қолданыстағы станцияларды жаңғырту және жаңа генерациялайтын қондырғылар салу жоспарланған.

Ерлан Ақкенженов, ҚР Энергетика министрі:

- Энергетика министрлігі еліміздегі аталған тапшылықты жабу үшін электр энергетикасы саласын дамыту жөніндегі іс-шаралар жоспарын әзірледі, міне, сіз айтқандай, қосымша 26 ГВт-қа жуық жаңа өндіруші қуаттарды енгізуді көздейді. Жоспар 35 жылға дейін есептелген. Жалпы министрлік 2035 жылға дейін қолданыстағы станцияларды жаңғырту, реконструкциялау және кеңейтуді жоспарлап отыр.

Түстен кейін Үкімет басшысы Олжас Бектенов облыстың бизнес өкілдерімен алқалы жиын өткізді. Мемлекет басшысының өнеркәсіпті дамыту жөніндегі тапсырмаларының іске асырылу барысымен танысып, экономиканың нақты секторын қолдау мәселелерін талқылады.

Авторлары: Қарлығаш Қасиетова, Дәулет Қошқарбаев