Атырау облысында ауыл мектептері мен балабақша қызметкерлері шипажайға тегін жолдама алды, деп хабарлайды 24kz.

Мұндай бастама «Жұмысшы мамандықтар жылы» аясында жүзеге асырылды. Жалпы жыл соңына дейін аймақта білім саласының мыңға тарта қызметкері осындай мүмкіндікке ие болады.

Арыстанбек Кенже, тілші:

- Мағыш Ізмұқанова Құрманғазы ауылындағы мектепте тазалықшы боп жұмыс істейді. Бұл 35 жыл еңбек өтілі бар қарапайым жұмысшының шипажайға келуі алғаш. Тегін жолдамаға ие болғанына қуанышты екенін айтады.

Мағыш Ізмұқанова, мектеп тазалықшысы:

- Бұрын естідім. Бірақ біздерде ондай ақша болған жоқ. Қазір осы тегін істеп жатыр, рахмет. Менің ауыратын жерім мысалы, аяқ-қолым сырқырайды. Сол үшін келіп жатырмын.

Бұл жолы шипажай жолдамасына 50 қызметкер іріктелді. Олар мұнда 8 түрлі ем түрін қабылдайды. Оның ішінде балшық емі, электрофорез, ыстық ванна секілді салқынға қарсы ем-дом шаралары бар.

Әлібек Жұмағалиұлы, көлік жүргізуші:

- Осы 45 жыл еңбек өтілім бар. Содан бері қарапайым жүргізуші болып жұмыс істеп келе жатырмын. Жүргізуішінің аурулары белгілі ғой енді, түрлі буын аурулары мазалайды. Соны осында балшық емі бар, басқа парафиндер бар, түрлі ванна сулары бар, солардан ем алсам ба деп келіп жатырмын.

Жалпы биылдан бастап аймақтағы мектеп пен балабақша тазалықшылары жаңа мамандықты иегере бастады. Білім беру мекемелерінде құрылған кәсіподақ ұйымдарының ұсынысымен қарапайым тазалықшылар мен басқа да техникалық қызметкерлердің еңбегі бағалана бастады.

Қылышбай Сүндетұлы, облыстық білім және ғылым қызметкерлері кәсіподағының төрағасы:

- Атырау облыстық білім беру басқармасымен жасалған салалық келісімге сәйкес 178 кір жуушыны оқытып, оларға кір жуу машинасының операторы деген мамандық алып беруге көмектестік. Оларға енді сол келісімге сәйкес, біліктілігі үшін қаражат төленетін болып есептелінді.

Биыл білім саласы кәсіподағының қолдауымен мыңнан астам адам осындай тегін жолдама алады. Жалпы кәсіподақ құрамында 30 мыңдай қызметкер бар. Олар мүмкіндігіне қарай елдегі шипажайларда демалады.

Авторлары: Арыстанбек Кенже, Айбек Байзақов, Жандос Бахметуллин