0:00:00

Жаңалықтарды Telegram арнамыздан оқыңыз!

Қызылорда облысында ауыз су жүйесіне қосылмаған 20-дан аса елдімекен бар. Соның бесеуі Арал ауданында. Шалғайдағы ауылдарды тіршілік нәрімен қамтамасыз ету жобасы 2021 жылы басталған. Бірақ, құрылыс жұмыстары әлі күнге дейін созылып келеді. Теңізді өлке тұрғындарының мәселесі қашан шешіледі? Тілшіміз Әділбек Серікұлы біліп қайтты.

120-дай түтіні бар Тоқабай ауылы Қарақұм даласында орналасқан. Мұндағы жұрт байырдан жер асты құдығынан су ішіп, өмір сүріп келеді. Елдімекен тұрғындары ұзақ жылдардан бері Сарбұлақ топтық су құбырына қосуды сұрап келеді.

Жаңаталап Ермаханов, ауыл тұрғыны:

Сусыз тіршіліктің көзі жоқ қой өзі. Қай нәрсенің басы суда. Су болған жерде бәрі де болады. Осыдан 5 км жерден водовозбен тасимыз. Ол водовозымыз жүрмей қалады қыс айында. Қиын. Жол қатынасы да қиын болып тұр еді.

Ел ұзақ күткен жоба былтыр қолға алынды. Кенезесі кепкен ауыл жұртының таза суға қарық болатын күні алыс емес. Былтыр елдімекен ішіне ауыз су желісі жүргізіліп, әр үйге құбыр тартылып қойды. Қаржы мәселесі шешілсе жоба биыл толық аяқталуы тиіс.

Раушан Айтмағанбетова, ауыл тұрғыны:

Құрал-сайманын әкелгеннен кейін сендік. Құбырын несін жүргізіп қойды. апараттарын бәрін. Асыға күтіп отырмыз. Биыл орнатып берсе суымызды, тіптен жақсы болар еді.

Жалпы ауданда 2021 жылдан бері 5 ауылды орталықтандырылған ауыз су жүйесіне қосу көзделген. Бірақ, уақытында тиісті қаражат қаралмай құрылыс жұмыстары осы кезге дейін созылып келеді. Биыл теңізді өлкедегі маңызды жобаны аяқтауға Үкіметтен қомақты қаржы бөлінбек.

Шерхан Есжанов, Арал ауданы әкімінің орынбасары:

Бұл жұмыстарды аяқтау үшін заңсыз шығарылған активтерден 4,2 млрд теңге қаржыны осы мақсатқа жұмсауға бағытталды. Жыл соңына осы біз Тоқабай, Абай, Ерімбетжаға Тастүбек, Ақбасты елдімекенін толық ауызсумен қамтамасыз етеміз деп жоспарладық.

Жергілікті әкімдік қазынаға қаржат түссе жұмысты ширатуға уәде етіп отыр. Себебі, мердігерлер жыл соңына дейін 100 шақырымдай ауызсу магистралін жалғап, шалғай ауылдарды Сарбұлақ топтық су құбырына қосуы керек.

Әділбек Серікұлы