Жақында қала іргесінен қалалық емханаларға тиесілі медициналық қалдықтар мен құжаттар табылған .

Бұл туралы "Арнаулы автобаза" серіктестігінің басшылығы хабарлаған, деп жазады inbusiness.kz сайты "Ақжайыққа" сілтеме жасап.

Қазір Атырау қаласында қоқыстарды жинау жұмыстары жүргізіліп жатыр. Тәртіп бұзушыларды анықтау үшін бақылау камералары қолданылып, оларға қатысты тиісті шаралар қабылданды.

Шашылған қоқыстың арасынан бахилдер, қапшықтарға салынған медициналық қалдықтар, сондай-ақ емхана басшыларының қолы қойылған құжаттар анықталған. Оқиға орнына санитарлық-эпидемиологиялық қызмет (СЭС) пен полиция шақырылып, хаттама толтырылды.

Атырау облыстық полиция департаментінің мәліметінше, осы дерек бойынша 23 жастағы ер адамның Жұлдыз ықшамауданы аумағында "Газель" маркалы көлігімен рұқсатсыз қоқыс төккені анықталды.

"Заңсыз жерге қоқыс төккен азаматқа Қазақстан Республикасының Әкімшілік құқық бұзушылық туралы кодексінің 505-бабы (қалалар мен елді мекендердің аумақтарын абаттандыру ережелерін бұзу) бойынша әкімшілік хаттама толтырылды", — деді полиция департаментінен.