Елімізде бала құқын қорғау шаралары күшейтіледі. Президент Қасым-Жомарт Тоқаев Ұлттық құрылтайда осыған қатысты бірқатар тапсырма жүктеді. Былтыр еліміздің барлық өңірінде балаларға арналған психологиялық қолдау орталықтары ашылды. Заңға маңызды өзгерістер енгізілді. Тұрмыстық зорлық-зомбылыққа қарсы күрес жөніндегі заң қабылданғаннан кейін жағдай біршама жақсарды. Алайда бұл мәселе кейбір шалғай аудандарда шешілмей отыр. Бұл туралы Президенттің өзі де айтты. Себебі жергілікті билік өкілдері мен қоғам белсенділері тұрмыстық зорлық-зомбылықтың алдын алу шараларына жеткілікті деңгейде атсалысып отырған жоқ. Сондықтан олқылықтың орнын толтыру қажет. Ол үшін Президент «Қазақстан балалары» атты біртұтас бағдарлама қабылдау қажеттігін тапсырды. Яғни бала құқығына қатысты барлық құжат бір жүйеге келтіріледі.