Үш күннен бері тоқтамаған иммиграциялық және кедендік бақылау қызметіне қарсы көтеріліс енді федералды үкімет деңгейінде ушығып барады, деп хабарлайды 24kz.

Калифорния штатының губернаторы Гэвин Ньюсом Дональд Трампты сотқа берді.

Ол губернатордың сұрауынсыз Ұлттық гвардия әскерінің Лос-Анжелестегі көтерілісті басуға жіберілуін Конституцияға қайшы деп есептейді. Жаңа Лос-Анжделеске қосымша әскер кіретінін айтқан едік.

Ердана Ержанұлы, тілші

- Трампты сотқа берушілер қатары Гарвард университетінен кейін тағы бір тарапқа толығып отыр. Нақтырақ айтсақ, бүгін ғана Калифорния штаты губернаторы Гэвин Ньюсом мен штаттың бас прокуроры Роб Бонта федералдық үкіметке қарсы сотқа өз арыздарын тастады. Бұл жерде тек Дональд Трамп қана емес, Пентагон басшысы Пит Хегсетке де таяқтың бір ұшы тиіп кеткелі тұр. АҚШ президентінің елдегі көтерілісті басуға федералды жасақты тартуы 1965 жылдан бері алғаш рет болып тұрған жағдай. Ол кезде Алабама штатындағы афроамерикалық азаматтардың сайлау құқығын қорғау көтерілістері кезінде шерушілерді қорғау үшін дәл осылай ұлттық гвардия әскері Сельма аралына енгізілген еді. Ол кездегі президент Линдон Джонсон Алабама штатының билігінің дәрменсіздігіне қарап, жергілікті полицияның қатігездігін доғару үшін жасаған. Енді тура 60 жылдан кейін президенттің осындай пәрмені тағы да қайталанып, өткен аптада 60 күнге 2000 Ұлттық гвардия әскері тартылды. Бүгін тағы 700 Теңіз жаяу әскері қосылды. Трамп бұны: «Тамаша шешім», деп тағы 2000 әскерді қосуды жоспарлап отыр. Ал губернатор Ньюсом мұны «Конституцияға қайшы» деп сотқа беріп жатыр.

Дональд Трамп, АҚШ президенті:

- Лос-Анджелестегі ахуалды оқып-біліп жатырсыздар. Жағдайды тұрақтандыру үшін Біз Ұлттық гвардияны жібердік. Әскерилер шынымен де ондағы көптеген мәселені шешуге көмектесті. Жергілікті билік қол қусырып, қорқып отырды. Әскерлерімізге алғысым зор. Ал губернатордың жасап жатқан ісіне қараңыздаршы. Ол біздің ұлы штаттарымыздың бірін құрдымға жіберіп жатыр. Егер мен араласпағанда, егер біз гвардияны жібермегенімізде, жағдай тіпті қиын болар ед. Өйткені елде тәртіп пен қауіпсіздік болуы тиіс.

Гэвин Ньюсом, Калифорния штаты губернаторы:

- Трамптың Лос-Анджелеске тағы 2000 Ұлттық гвардия сарбазын жіберіп жатқаны жайлы жаңа ғана хабар алдым. Ал алғашқы 2000 сарбаз ше? Олардың көбі әлі де іске қосылған жоқ – шамамен 300-і ғана көшеге шыққан, қалғандары бұйрықсыз күйде федералдық ғимараттарда отыр. Тамақ та, су да берілмеген. Бұл әрекеттің қоғамдық қауіпсіздікке қатысы шамалы. Мұның бәрі өзін күшті етіп көрсеткісі келетін аса қауіпті президенттің амбициясын қанағаттандыру үшін жасалып отыр. Бұл – жауапсыз әрі мағынасыз қадам. Және мұны біздің сарбаздарға деген құрметсіздік деп білемін.

Ердана Ержанұлы, тілші:

- АҚШ Кодексінің 10-тарауы 12406-бөлімінде аталатын заң шетелдік басқыншылық немесе көтеріліс кезінде ғана қолданылуы тиіс. Көтеріліс болып жатыр. Тіпті тәртіпсіздікке ұласып, талай мүлікке зардап келгені рас. «Бірақ жағдай тек Трамптың шешімінен кейін ушыға түсті», - дейді Калифорнияның бас прокуроры Роб Бонта. Ол бастаған заңгерлер тобы президент бұл шешімге губернатормен келіспей тұрып қол қойып жібергендіктен, бұл бұйрықты заңсыз деп танып отыр. Бұл сотқа шағымданудың мақсаты – Трамптың Ұлттық гвардияны федералдық басқаруға алып, оларды Лос-Анджелеске жіберу туралы бұйрығы заңсыз болғанын сот арқылы ресми түрде мойындату.

Роб Бонта, Калифорния штатының бас прокуроры:

- Калифорния губернаторы қажет болған жағдайда Ұлттық гвардияны қалай шақыру керектігін жақсы біледі. Ол мұны Лос-Анджелестегі өрт кезінде де істеген, 2020 жылдың жазында Калифорниядағы наразылықтар кезінде де қолданған. Яғни бұл – губернатор Ньюсомның егемен құқығына жататын шешім. Ол бұл жолы Ұлттық гвардияны қолдануға рұқсат берген жоқ, сұратқан да жоқ. Кешегі түстен кейін губернатор Ньюсом Пит Хегсетке ресми хат жолдап, Қорғаныс министрінің бұл әрекетті тоқтатып, сарбаздарды губернатордың қарамағына қайтаруын сұрады. Бұл өтініш елеусіз қалды. Біз президенттің билігін асыра пайдаланып, Калифорния Ұлттық гвардиясын заңсыз жұмылдыруын қатаң айыптаймыз.

Алайда президент Трамп: «Қала тұрғындарының қауіпсіздігі үшін жеткілікті билік тиісті әрекетті жасамады» деп, штат билігін айыптап, «Тіпті дәрменсіздігі үшін губернатордың өзін абақтыға қамау керек», — деп дүрсе қоя берді.