0:00:00

Жаңалықтарды Telegram арнамыздан оқыңыз!

Түркістан облысы Қаратөбе аулының балалары орта білім алу үшін көлігі сапырылысқан күре жолды бойлап, күнде бірнеше шақырым жаяу жүреді. Ал шамасы келген жұрт перзентін Шымкент қаласынан пәтер жалдап оқытып жүр. Ауылдағы басқа балалар жырақта интернатта жатуға мәжбүр. Қаратөбе ауылы тұрғындарымен тілшіміз кездесіп қайтты.

Жүзден астам түтіні бар Қаратөбеде мектеп жасындағы баланың саны екі жүз елуден асады. Оның жоғары сыныпқа өткен ересектері қыркүйек басталысымен үйдің бетін көрмейді. Ал, ауыл мектебіндегі білімге көңілі толмаған бүлдіршіндер тіпті ерте бастан-ақ ата-анадан жырақ кетеді.

Мырзалы Әліханов, ауыл тұрғыны:

50-60 шақтысы қазір шет жақта. Жартысы Қыдыр Мәмбетов ауылында оқып жатыр. Төменде бұрынғы Сталин фермада. Жартысы мынау Атбұлақта интернатта жатып оқиды. Мектептен қорқып әке-шешесі әкетіп қалған. Мектептің төбесі құлайды деп.

Бауыржан Князев ауыл тұрғыны:

Жолмен барады ғой, сол ғой уайымымыз, жолда тротуар жоқ. Үлкен көшені бойлап жүреді. Сондай балалардың 30 шақтысы төменгі ауылда оқып жатыр 5 шақырым жердегі.

Қаратөбедегі мектеп ғимаратын ширек ғасыр бұрын ауыл тұрғындары асарлатып жүріп өз күштерімен салған. Жылда әктеп, сылағанның арқасында қалқайып, әзер тұр. 3-4 сынып бөлмесі бар білім ұясы балаларға тек негізгі білім ғана береді.

Ербол Әшірбаев, мектеп директоры:

Үйірме жұмысымен айналысатын акт залымыз жоқ, кітапханамыз жоқ және мультимедиялық кабинетіміз жоқ. Мұғалімдердің әрі қарай жақсы жұмыс істеуіне әзірге материалдық жағдайымыз төмен.

Осыдан 5-6 жыл бұрын ауылға мектеп салынатын болған. Қазынада ақша жоқ деп жүргенде құрылысқа рұқсат беретін құжаттардың мерзімі өтіп кетті. Артынша білім ұясын өз қаржысына салатын кәсіпкер табылады. Бірақ екі жылдан бері ешкімге ұстатпай жүр.

Бекайдар Тойлыбаев, Төле би ауданы білім бөлімінің басшысы:

Өзекті мәселеге біз ешнәрсе істей алмай отырмыз. Өйткені заңға байланысты 3 жылға келісімшартқа отырған. Білім бөлімінің , басқарманың кінәсі жоқ. ИП Қаламбаева салмай отыр. Кәсіпкерге ешнәрсе айта алмайсың.

Кәсіпкердің екі жылда бар бітіргені 200 оқушыға лайықталған мектептің шұңқырын қазды да қойды. Осылайша тұрғызылған мектеп жоқ. Ал қаржысы бар өзге біреуге жерді алып бере алмайды. Яғни ауыл балаларының әлі біразға дейін білім іздеп үйден жырақ, ата-анадан алыс жүретін түрі бар.

Ғани Қалмахан