AMANAT партиясы еліміздің түкпір-түкпіріндегі дәрігерлердің басын қосты.

600-ден астам медицина маманы: медбикелер, ғалымдар, медициналық ұйым басшылары және сарапшылар "Дәрігер Talks" партиялық диалог алаңының II отырысына жиналып, отандық медицинада орын алған жүйелі мәселелерді саралап, шешу жолдарын ортаға салды. Мәжіліс Төрағасы, партия Төрағасы Ерлан Қошанов сөз басында жиналғандарды кәсіби мерекелерімен құттықтап, дәрігерлердің ел өміріндегі ерекше рөлін атап өтті. Депутаттық корпус пен Денсаулық сақтау министрлігінің бірлескен жұмысы арқылы медицина қызметкерлеріне біліктілік санаттарын берудің жаңа жүйесі өзгертілді. Мыңдаған дәрігер мен медбике тестілеусіз баламалы біліктілік деңгейін алды. Бұл медицина қызметкерлерінің партияға жолдаған көптеген өтінішіне жауап ретінде қабылданған шешім, деді Спикер. Президент тапсырмасы бойынша дәрігерлерді кәсіби сақтандыру жүйесі енгізілді: бұдан былай дәрігердің қателігінен орын алған шығындар мамандардың жеке қаражатынан емес, бюджет есебінен жабылады. Отырыста отандық дәрілік препараттармен қамтамасыз ету, МӘМС жүйесінің ашықтығы сынды бірқатар мәселе көтерілді.

Ерлан Қошанов, ҚР Парламенті Мәжілісінің төрағасы