Алматыда 20 жыл бойы құжатсыз жүрген әйелге жеке куәлік табысталды, — деп хабарлайды Massaget.kz тілшісі .

1964 жылы туған әйел Қазақстан аумағында кейінгі 20 жыл бойы жеке басын куәландыратын құжатсыз өмір сүріп келген. Құжатсыз қалуына кеңес заманында берілген, 1974 жылғы үлгідегі төлқұжаты жоғалуы себеп болған.

Бұл жағдай әйелдің әлеуметтік жағдайына да кері әсерін тигізген. Ол зейнетақы рәсімдей алмаған, заңды баспанасы да болмаған.

Ұзақ уақыттан кейін әйел Қазақстан Республикасының азаматы ретінде ресми түрде танылып, жеке куәлік алды.

"Мұндай жағдайларды тек қызметтік міндет ретінде емес, ең алдымен адами міндетіміз деп қабылдаймыз. Әрбір құжатсыз қалған адамның артында ауыр тағдыр тұр. Біздің басты парызымыз – сол азаматтың заңды құқығын қалпына келтіріп, мемлекет тарапынан қорғалатынын түсіндіру", — деді Алматы қалалық көші-қон қызметі басқармасының бастығы Еркін Амантаев.

Құжат алған әйелге зейнетақы мен басқа да әлеуметтік жеңілдіктерді рәсімдеуге көмек көрсетіліп жатыр.

Өзекті жаңалықтарды өз уақытында оқу үшін Facebook парақшамызға жазылыңыз!