Абай облысында ірі кәсіпкерлермен әріптестік орнату мақсатында 15 меморандумға қол қойылды, деп хабарлайды 24kz.

Құжаттарға сәйкес өңірде 75 мың тұрғынға арналған жаңа шағын аудан, ірі май өңдеу зауыты және бірқатар әлеуметтік нысандар салынады. Бұл бастамалар арқылы жергілікті билік аймақтың инвестициялық әлеуетін арттыруды көздейді.

Семейдегі ауқымды инвестициялық форум 500-ге жуық бизнес өкілін жинады. Абай облысының әкімі Берік Уәлидің айтуынша, олардың қолдауымен өңірде 15 ірі жоба жүзеге асырылмақ.

Берік Уәли, Абай облысының әкімі:

- «Туған жерге туыңды тік» деген бұл жалаң ұран, бос сөз емес. Бұл шын мәнінде туған ел үшін, туған жер үшін өзінің нағыз патриот азамат екенін, отансүйгіштігін дәлелдейтін әр азаматтың туған жер алдындағы борышы деп білеміз.

Абай облысының инвестициялық әлеуеті жоғары. Әсіресе, инвесторларды өңірдің географиялық орналасуы қатты қызықтырады. Қытай, Ресей және Орталық Азияны байланыстырып тұрған маңызды торап осы Абай облысы саналады. Бұл көлік-логистика хабын дамытуға мол мүмкіндік береді. Қазір өңірде жалпы құны 2 трлн 700 млн теңгеден асатын 38 жобадан тұратын бірыңғай инвестициялық портфель қалыптасқан. Солардың бірі – заманауи ет комбинатының құрылысы.

Ерлан Мұқашев, «Agro Land Co» ЖШС басшысы:

- Біздің комбинат Семейге жақын орналасқан Шақаман ауылында салынады. Жоба құрамында 9 цех қарастырылған. Яғни бұл – терең өңдеумен айналысатын өндіріс орны. Мұнда 120-дан астам түрлі өнім түрі шығарылады.

Ауқымды жобалардың қатарында «Smart City Semey» атты жаңа шағын ауданның құрылысы да бар. Жалпы аумағы мың гектарға жететін қалашықта 75 мың адамға арналған көпқабатты тұрғын үйлер мен 40-тан астам әлеуметтік және инфрақұрылымдық нысандар бой көтермек.

Авторлары: Ботагөз Дандыбаева, Берік Жобалайұлы