Ақтауда қалалық прокуратураның бастамасымен балаларына материалдық қолдау көрсетпей жүрген ата-аналардың әрекетіне қарсы шаралар қабылданды. Алимент төлемей жүрген бір борышкерден пәтер тәркіленді, — деп хабарлайды Massaget.kz тілшісі Lada.kz-ке сілтеме жасап.

Бас прокуратура мәліметінше, биыл алимент өндіруге байланысты атқарушылық құжаттарға кешенді талдау жүргізілген. Нәтижесінде уәкілетті органға ұсыныс енгізіліп, соның негізінде өндіріп алушылардың пайдасына 33 миллион теңге көлеміндегі берешек қайтарылып, бір пәтер тәркіленді.

Бұдан бөлек, балаларына материалдық қолдау көрсетуден жүйелі түрде жалтарған 26 азаматқа қатысты әкімшілік шаралар қолданылды. Қазақстан Республикасы Әкімшілік құқықбұзушылық туралы кодексінің 669-бабының 1-бөлігі (Сот үкімін, сот шешімін немесе өзге де сот актісі мен атқарушылық құжатты орындамау) бойынша айыппұл және әкімшілік қамауға алу түріндегі жаза тағайындалды.

Сондай-ақ, Маңғыстау облысының кәмелетке толмағандар істері жөніндегі мамандандырылған ауданаралық соты алимент төлемеген бес борышкерге қатысты айыптау үкімін шығарды.

Ақтау қаласының прокуратурасы алимент төлемеу ҚР Қылмыстық кодексінің 139-бабының 1-бөлігі бойынша қылмыстық жауапкершілікке әкеп соғатынын еске салады. Заң бойынша, үш айдан аса уақыт бойы балаларын материалдық қамтамасыз етпеген азаматтарға 600 сағатқа дейін қоғамдық жұмысқа тарту, екі жылға дейін бостандығын шектеу немесе екі жылға дейін бас бостандығынан айыру түріндегі жаза қарастырылған.

Қызықты жаңалықтар мен видеоларды көру үшін TikTok арнамызға жазылыңыз!