Базалық мөлшерлеме 16,5% деңгейінде сақталады. Ақша-кредит саясаты комитетінің бұл шешімін Ұлттық банк төрағасы түсіндіріп өтті, деп хабарлайды 24kz.

Тимур Сүлейменовтің айтуынша, бұған үш түрлі фактор әсер етті. Атап айтқанда, инфляция динамикасы, ішкі экономикадағы үдерістер және сыртқы экономикалық факторлар. Ұлттық банктің мәліметі бойынша, маусымда жылдық инфляция 11,8%-ке өскен. Бұған көбіне қызмет көрсету секторындағы ахуал әсер еткен. Ауылшаруашылық өнімдері мен импорт бағасы көтерілгендіктен азық-түлік инфляциясының өсімі 10,6%-ті құрады. Азық-түлікке жатпайтын тауарлардың бағасы 9,4%-ке көтерілді. Жалпы 2025 жылдың алғашқы бес айында ел экономикасы 6%-ке өскен. Ең көп өсім көлік, құрылыс, сауда саласында байқалады. Тау-кен өндіру және өңдеу өнеркәсібінде де іскерлік белсенділік артып келеді.

Тимур Сүлейменов, ҚР Ұлттық банктің төрағасы:

- Болжам бойынша инфляция жыл соңында 10,5-12,5% аралығында қалыптаспақ. Тұрақты ішкі сұраныс, фискалдық ынталандыру, тұтынушылық несиелеу, жоғары инфляциялық күтулер сақталып, тарифтік реформа мен салық-бюджет саясаты жүргізіліп жатыр. Бұл ақша-кредит саясатын мейлінше ұзақ уақытқа қатаң сақтап тұру қажеттігін білдіреді. Базалық мөлшерлеме 2025 жылдың соңына дейін қазіргі деңгейінде сақталуы әбден мүмкін.