Жаңаөзенде әлеуметтік кәсіпкер көбейді, деп хабарлайды 24KZ. Биыл 7 адам мемлекеттен қайтарымсыз грант алып, жеке кәсібін ашты. Кейбірі өңірде баламасы жоқ бизнес жоба жасады.

Айнұр Жанәбіл көпбалалы ана. Біраз уақыт бала күтімімен айналысқан ол өзіне ыңғайлы жұмыс іздейді. Үйіне жақын жерде ашылған офтальмологиялық орталыққа еш кедергісіз орналасады. Тәжірбиелі мейірбике балалар мен ересектердің көру қабілетін тексеріп, қажетті емін жасайды.

Айнұр Жанәбіл, қала тұрғыны:

- Уақытпен есептегенде 3 жылдан бері келіп отырған балалар да бар. Туғалы пайда болғаны бар, жүре келе пайда болғаны бар. Бәрі де бізбен тек уақытпен нәтиже шығарып жатыр. Тәжірибем бар. Бұрын медицина саласында қызмет жасадым. Ешқандай қиындығы жоқ.

Көз ауруларын аппаратпен емдеу мекемесін жаңаөзендік Жұлдыз Көшкінбаева ашқан. Жергілікті кәсіпкерлер палатасы мамандарының кеңесімен «әлеуметтік кәсіпкер» ретінде тіркеледі. Бизнес-жоспар жасап, комиссия алдында қорғап шығады. Соның нәтижесінде 5 млн теңге қайтарымсыз грант ұтқан.

Жұлдыз Көшкінбаева, әлеуметтік кәсіпкер:

- Қазір ең маңызды амблиокор аппаратын іске қостық. Қаңтар айынан бастап жұмыс жасап келеміз. Сол шарт бойынша мен жұмыспен қамтамасыз етуім керек еді. Сол аппаратқа 2 әлеуметтік топтағы, яғни көпбалалы аналарды жұмысқа алдым. 3 мейірбике де біздегі көпбалалы ана болып табылады.

Ақиқат Шарапатдинов, облыстық кәсіпкерлер палатасы Жаңаөзен филиалының директоры:

- Жаңаөзен қаласында осы үш жылдықта ғана 5 млн-дық гранттар ала бастады. Себебі осы уақытқа дейін облыс көлемінде болғандықтан, қаражат шектеулі болып келді. Ал қазіргі таңда көптеген мүмкіндікке мына кәсіпкерлерді қолдау орталығының ашылуы және жалпылама бюджеттің үлкеюі себепші болды.

Мемлекеттік бағдарлама бастамашыл азаматтардың кәсіп бастауына немесе қолданыстағы ісін дамытуға мүмкіндік береді. Жобаға 2023 жылы 5 адам, былтыр 3 тұрғын қатысқан. Олар тігіншілік, кондитерлік тағам өндірісі және мал шаруашылығы саласында бизнес ашқан. Жалпы Жаңаөзенде 12 мыңнан астам кәсіпкерлік субъектісі тіркелген. Бұл былтырға қарағанда 20% көп.

Авторлары: Талғат Исламұлы, Ренат Досалиев